Hamilə qadın, südverən analar oruc tutmalıdırlar? - AÇIQLAMA –ÖZƏL

Artıq Mübarək Ramazan ayının 5-ci günüdür. Lakin orucla bağlı insanları bir çox məsələlər maraqlandırır. Bu məsələlərdən biri isə hamilə qadınların, südverən anaların Ramazan ayında oruc tutması ilə bağlıdır. Bu icazəlidirmi və ya tutmasa, hökmü nədir?

Mövzuyla bağlı Sonxeber.az-a ilahiyyatçı, İslamşünas, şəriət müəllimi Gülbəniz Novruzova açıqlama verib.

O bildirib ki, fərqli situasiyalarda ananın və körpənin halına görə hökm dəyişir:

"Bildiyiniz kimi, Allah Təala "Bəqərə" surəsinin 183-cü ayəsində buyurur: "Ey iman gətirənlər! Oruc tutmaq sizdən əvvəlki ümmətlərə vacib edildiyi kimi, sizə də vacib edildi ki, (bunun vasitəsilə) siz pis əməllərdən çəkinəsiniz!"

Oruc insanın sağlamlığına xeyirdir. Hətta həkimlərin sözlərinə görə, ən ağır xəstəlik olan xərçəng xəstəliyinə tutulan insanlar, şəkər xəstələri belə, oruc tutmaqla sağlamlıqlarına qovuşa bilərlər. Bu səbəbdən Allah orucu vacib buyurub ki, insanlar oruc tutmaqla sağlam olsunlar. Amma yadda saxlamaq lazımdır ki, yeyib-içməkdən özümüzü saxladığımız qədər pis əməllərdən də çəkinməliyik. İnsan özünü qeybətdən, böhtandan, yalandan, batil əməllərdən qorumalıdır. Həmçinin, çalışmalıdır ki, yaxşı işlərini çoxaltmaqla bu aydan bütün günahlarından paklanaraq çıxa bilsin.

Əgər hamilə qadının oruc tutması bətnindəki körpəyə zərəri olarsa, onun inkişafını gecikdirərsə, çatışmazlıq yaradarsa və bunu həkim təsdiqləyərsə, həmin xanım oruc tutmamalı, övladı dünyaya gəldikdən sonra isə həmin günlərin qəzasını yerinə yetirməlidir. Hamilə qadının əgər özünə ziyanı olarsa, məsələn, həkim desə ki, "uşaqda hər şey normaldır, əksinə, az yeməlisən", bu halda həmin xanım oruc tuta bilir. Amma yenə də çətinlik çəkir, baş gicəllənməsi olur, təzyiqi qalxıb-düşürsə, oruc tutmamalıdır. Hamiləlikdən azad olunandan sonra isə həmin günlərin qəzasını tutmaqdan əlavə, hər gün üçün bir mud təam (750 qram buğda, un və s.) fəqirə verməlidir.

Uşağa süd verən xanımlar isə fərqlidir. Əgər uşaq tək ana südü deyil, başqa qida da yeyirsə, bu zaman ana orucunu tutmalıdır. Çünki uşaq ac qalmır. Amma uşaq yalnızca ana südü ilə qidalanırsa və oruc tutmaq ananın südünü azalda bilərsə, uşağın ac qalmağına səbəb olarsa, bu halda həmin qadının haqqı boynundan götürülür. Daha sonra həmin günlərin qəzasını yerinə yetirməlidir.

Süd verən ana özü zəifdir, amma südü çoxdursa, bu halda hökm yenə fərqlidir. Belə ki, uşaq doyursa, oruc tutmaqla da süd azalmayacaqsa, lakin ana özü əziyyət çəkirsə, bu halda da oruc həmin qadına vacib deyil, daha sonra orucunun qəzasını tutmalı, hər gün üçün yenə də bir mud təam fəqirə verməlidir".

Aysel SƏFƏRZADƏ

Telegramda izləyin