Süni mayalanma HARAMDIR? - AÇIQLAMA

Bildiyimiz kimi, uzun illər valideyn olmaq arzusunda olanların bəziləri süni mayalanma yolu ilə övlad sahibi olurlar. Lakin bir çox insanlar süni mayalanmanın İslam dinində haram olduğunu bildirirlər. Doğrudanmı süni mayalanma haramdır?

Məsələ ilə bağlı Sonxeber.az ilahiyyatçıların fikrini öyrənib.

Qafqaz Müsəlmanları İdarəsinin sədr müavini Fuad Nurullayev bildirib ki, din alimlərinin bu məsələyə yanaşması fərqlidir:
"Bu məsələyə müxtəlif prizmalardan yanaşma fərqli olsa da, son nəticə ondan ibarətdir ki, şəriətə əsasən, kəbini, halallığı olan kişi və qadın tibbin bu imkanlarından istifadə edərək, süni mayalanma yoluyla övlad sahibi ola bilərlər.

Lakin bu məsələdə halallıq mütləq nəzərə alınmalıdır. Lakin dünya sistemində süni mayalanma fərqli yollarla edilir. Yad qadının, yaxud yad kişinin hüceyrələrindən də istifadə olunur, bu səbəbdən mövzunu müzakirəli hesab etmək olar. Amma insanların öz halalından süni mayalanmanın həyata keçirilməsi mümkündür".

İlahiyyatçı alim Ağa Hacıbəyli də bu fikrləri təsdiqləyərək bildirib ki, bunun şəri ölçüləri var:

"Şəri ölçü ondan ibarətdir ki, nigahı olan insanlar arasında, təbii ki, müayinə aparılır. O yöndə aparılacaq tibbi ölçü, sözsüz ki, məqbul və dinimizə uyğundur. Amma bunun xaricində ola biləcək hər hansı bir hal - rəhmin kirayələnməsindən tutmuş fərqli döllərin yerləşdirilməsinədək - qətiyyətlə haram və qadağandır".

ZAİRA AKİFQIZI

Telegramda izləyin