Azərbaycanlı qadından həbsdə ola-ola DƏLƏDUZLUQ: Vitse-prezident təyin etmək üçün...

Külli miqdarda dələduzluqda təqsirləndirilən Ülkər Qədirovanın cinayət işi üzrə ibtidai istintaq başa çatıb.

Lent.az-ın məlumatına görə, iş üzrə toplanan materiallar baxılması üçün Bakı Ağır Cinayətlər Məhkəməsinə göndərilib. İş hakim Azad Məcidovun icraatına verilib.

Əldə olunan məlumata görə, 48 yaşlı Ü.Qədirova 2011-ci ildə Bakı Ağır Cinayətlər Məhkəməsinin hökmü ilə 11 il müddətinə azadlıqdan məhrum edilib. Ancaq vaxtından tez azadlığa buraxılıb. O, hətta məhkumluğu ola-ola doqquz nəfərə qarşı dələduzluq edib. İki nəfərə paytaxtın Binəqədi rayonunda ev tikib satmaqla pul qazanmağı "məsləhət görüb". Bu yolla onlardan 23 min və altı min manat pul alıb. Onlardan biri, Kərimov Aftandil Murad oğlu "Azəriqaz"ın İsmayıllı rayon şöbəsinin rəisidir. Həmçinin bir nəfəri Çevik Polis Alayına, bir nəfəri isə xarici şirkətdə fəhlə işinə "düzəltmək" adı ilə hərəsindən doqquz min manat pul alıb.

Daha maraqlısı isə odur ki, Ülkər Qədirova "Azəriqaz"ın İsmayıllı şöbəsinin rəis müavini Mehdiyev Qurban Hacıməmməd oğlundan 60 min manat pulu dələduzluq yolu ilə mənimsəyib. O, Q.Mehdiyevi "SOCAR"a vitse-prezident təyin etmək adı ilə aldadıb.

Zərərçəkmişlər arasında Azərbaycanda fəaliyyət göstərən "Azərtütün Aqrar Sənaye Kompleksi" MMC-nin rəhbəri Zeynalov Əliyusif Məmiş oğlu da var.

Bütün bu cinayət əməllərinə görə Ü.Qədirova sadalanan zərərçəkmişlərdən ümumilikdə 107 min manat pulu dələduzluq yolu ilə ələ keçirib.

Telegramda izləyin