Aqşin Fatehlə dava edən şəriki bir neçə nəfərin zəhərlənməsinə səbəb olubmuş - YENİLƏNİB

Meyxanaçı Aqşin Fatehin restoran şərikinin kimliyi müəyyənləşib.

Oxu.Az-ın əldə etdiyi məlumata görə, bu, 2019-cu ilin dekabrında üç nəfərin – Bakı sakinləri Sərxan Bayramov, Mustafa Mustafayevin və Hacıqabul sakini Ülvi Qurbanovun içkidən zəhərlənməsinə səbəb olmuş "Baku City" restoranının müdiri Füzuli Alıyevdir.

O, "Chivas Regal 12" əmtəə nişanlı spirtli içkilərini ucuz qiymətə daha iki restorana ("Baku Voice Rooms" və "Everest") satmış, nəticədə üç nəfərin ölümünə və bir neçə nəfərin zəhərlənməsinə səbəb olmuşdu.

Maraqlı məqam isə ondan ibarətdir ki, həmin şəxs məhkəmənin qərarı ilə beş il müddətinə azadlıqdan məhrum edilib. Hökmə əsasən o, 2024-cü ildə azadlığa çıxmalı idi. Belə olan halda sual doğur: Həmin şəxs necə restoran işlədir?

15:35
Tanınmış meyxanaçı Aqşin Fatehlə şəriki arasında dava düşüb, xəsarət alan var.

Bakupost.az xəbər verir ki, hadisə A.Fatehin işlətdiyi "ByFateh1" restoranında baş verib.

Hadisəyə səbəb A.Fatehlə şəriki Füzuli Alıyev arasında baş verən narazılıq olub.

Məlumata görə, A.Fatehlə F.Alıyev 8 ay əvvəl şərik restoran açıblar, amma bir neçə ay sonra şəriklər arasında problemlər yaranıb.

Aprelin əvvəlindən F.Alıyev A.Fatehi restorana buraxdırmayıb və onlar arasında mübahisə yaranıb, şəriklik müqaviləsinə xitam verilib.

Aprelin 17-də isə A.Fateh bir neçə nəfərlə restoranda olan əşyalarını, özünə məxsus bəzi texnikalarını götürmək üçün oraya gedib.

Bu vaxt tərəflər arasında dava düşüb. Restoranı işlədənlər "102" xidmətinə və Binəqədi rayon Polis İdarəsinin 6-cı Polis Bölməsinə şikayət ediblər.

Onlar iddia ediblər ki, A.Fateh kriminal qruplaşmanın bir neçə üzvü ilə restorana hücum çəkib, əllərində bıçaqla onları hədələyiblər, zor tətbiq ediblər. Bu zaman restoranda gül satan qız zədələnib.

Qarşı tərəf bunun böhtan olduğunu, onlara məxsus əşyaları mənimsəmək üçün və qisas məqsədi ilə belə bir şikayət verildiyini bildirib.

Məsələ ilə bağlı 6-cı Polis Bölməsi şikayətçilərin iddialarının əsassız olmasını, heç bir sübut olmadığını əsas gətirərək şikayəti rədd edib.

Lakin şikayətçilər Binəqədi Polis İdarəsinə və Baş Mütəşəkkil Cinayətkarlıqla Mübarizə İdarəsinə (BMCMİ) şikayət ediblər.

Bundan sonra Binəqədi Polis İdarəsində xuliqanlıq maddəsi ilə cinayət işi açılıb.

Telegramda izləyin