Rusiya ərasizində partlayış və yanğınların sayı niyə artıb?

Getdikcə, Rusiya Federasiyasının sərhədyanı bölgələrində partlayışların sayı artır və yanğınlar başlayır.

Ukrayna ilə müharibə getdikcə Rusiya ərazisinə də daxil olur. Belə ki, son 2 həftə ərzində Rusiya Federasiyasının cənub bölgələrində partlayış və yanğınların coğrafiyası nəzərəçarpacaq dərəcədə genişlənib.

Yerli sakinlər arasında çaxnaşma yaranıb, hakimiyyət bomba sığınacaqları hazırlayır və Ukraynanı təxribatda ittiham edir.

Bizimyol.info xəbər verir ki, "Seqodnya" saytı sərhədyanı ərazilərdə baş verənləri və Rusiyanın hərbi və infrastruktur obyektlərinə hücumun arxasında kimin dayana biləcəyini öyrənib.

Neft anbarlarında yanğınlar və hərbi anbarlarda partlayışlar..

Fevralın 24-dən, yəni Rusiyanın Ukraynaya təcavüzünün başladığı gündən Rusiya Federasiyasının sərhədyanı rayonlarında partlayışlar və yanğınların sayı artır. Belə ki, aprelin 15-dən aprelin 27-dək onların sayı təxminən iki dəfə artıb. Ümumilikdə, Belqorod vilayətində 20, Kurskda 10, Voronejdə 4, Bryanskda 4 sayda "insident" baş verib.

Hadisələr Rusiya mətbuatında:

Belqorodda döyüş vertolyotları neft anbarına raket zərbələri endirdi;

Voronej və Kursk vilayətində pilotsuz təyyarələr vuruldu;

"Staraya Nelidovka" kəndində hərbi anbarda yanğın olub;

Juravlyovka kəndinə mərmi düşdükdən sonra partlayış baş verib;

Tetkino kəndində şəkər zavodunun ərazisində təmir olunan döyüş maşını partlayıb;

Krasnıy Oktyabr kəndi yaxınlığında neft bazasında yanğın baş verib.

Bununla yanaşı aprelin 25-də Rusiyanın Bryansk şəhərində Rusiya neftinin Avropa ölkələrinə daxil olduğu neft kəmərləri kompleksinin bir hissəsi olan "Drujba" neft bazasında, "Aqropromkomplekt"in ərazisindəki neft anbarında yanğın baş verib.

Rusiyada panika yaranıb. Bir sıra insidentlərdən sonra Rusiya Təhlükəsizlik Şurasının katibi Nikolay Patruşev bildirib ki, Rusiya Federasiyasının cənub bölgələrində əhali üçün fövqəladə hallar barədə xəbərdarlıq sisteminin etibarlı işləməsini təmin etmək və bomba sığınacaqlarını lazımi vəziyyətə gətirmək lazımdır.

Qeyd edək ki, Belqorod, Kursk və Voronej vilayətlərinin bir çox sakinləri genişmiqyaslı hərbi əməliyyatların başlanmasından qorxduğu üçün, evlərini tərk edərək daha sakit bölgələrə getməyə başlayıblar.

Rusiya Federasiyasının Federal Tətqiqat Bürosu neft bazalarında və hərbi anbarlarda baş verən yanğınların diversantların işi olduğunu bildirir.

Belqorod vilayətində təxribat hazırladığı iddia edilən iki rusiyalının "nəqliyyat infrastrukturu obyektlərindən birində" saxlanıldığı qeyd edilib. Onlar "Ukrayna nasizminin tərəfdarı" adlandırılıb.

Xüsusi xidmət məhbusların dindirilməsinin videosunu paylaşıb. Videoda məhbuslar FTB təlimatlarından əzbərlənmiş mətni oxuyublar. Onlardan biri deyib ki, "Hərbi qatarların hansı relslərlə hərəkət etdiyini başa düşmək üçün dəmir yolu relslərinə baxdım.Həm də yolun strukturunu və onun aradan qaldırılması üsullarını öyrəndim".

İkinci "diversiyaçı" isə deyir ki, onlar "vintləri açaraq, bərkidiciləri boşaltmaqla dəmir yoluna ziyan vurmağı planlaşdırıblar və bütün bu hərəkətlər internetdə məlumat yaymaqla ictimaiyyətə açıqlanmalı idi".

Ukrayna hakimiyyəti isə, onların Rusiyadakı partlayış və yanğınlarda iştirakını rəsmən təsdiqləməsə də, təkzib də etmir.

Ukrayna Müdafiə Nazirliyinin sözçüsü Oleksandr Motuzyanik bildirib ki, Ukrayna dövləti Rusiyanın Ukrayna ərazisindəki təcavüzünü dəf etmək üçün müdafiə əməliyyatı həyata keçirir. Amma bu o demək deyil ki, Ukryana Rusiya ərazisində baş verən bütün fəlakətlərə və bütün hadisələrə görə məsuliyyət daşımalıdır: "Bu səbəbdən də mən bu məlumatı nə təsdiqləyəcəyəm, nə də təkzib edəcəm".

Ukrayna Prezidentinin Aparatının rəhbərinin müşaviri Mixail Podolyak isə, Rusiyada baş verən hadisələri "karma" adlandırıb. Podolyak pz teleqram səhifəsində yazıb ki, karma qəddar bir şeydir.

Böyük Britaniya isə, hesab edir ki, Ukraynanın Rusiya Federasiyasına hücum etmək hüququ var. Belə ki, ölkənin müdafiə naziri Ben Uolles bildirib ki, Ukrayna müharibə qanunlarına uyğun olaraq işğalçı ölkənin ərazisindəki hərbi obyektlərə zərbələr endirmək hüququna malikdir: "Əgər Ukrayna həqiqətən də Rusiya ordusunun logistik strukturuna hücum etmək qərarına gəlsəydi, bu, beynəlxalq hüquq baxımından qanuni olardı. Müharibəni başlayan Moskvadır və indi Kiyevin Rusiya ərazisindəki hədəflərə və təchizat marşrutlarına zərbələr endirmək hüququ var".

Rusiya isə, qisas alacağı ilə təhdid edir. Belə ki, Rusiya Federasiyasının Müdafiə Nazirliyi Britaniya rəsmilərinin bəyanatını "Londonun birbaşa təxribatı" adlandırıb: "Silahlı qüvvələrimiz 24 saat ərzində Kiyevdəki müvafiq qərar qəbuletmə mərkəzlərinə uzaqmənzilli silahlarla cavab zərbələr endirməyə hazırdır".

ABŞ-ın dövlət katibi Entoni Blinkenin sözlərinə görə, Ukraynanın Rusiya təcavüzündən özünü müdafiə etmək üçün belə bir addım atmağa haqqı var.

Mixail Podolyak Blinkenlə razılaşır. Öz "Twitter" hesbaında Ukrayna Silahlı Qüvvələrinin hələ də Rusiyanı vura biləcəyinə eyham vuran Podolyak belə yazır: "Rusiya Ukraynaya hücum edib və dinc sakinləri qətlə yetirir. Ukrayna rus qatillərinin qatarlarına və bazalarına zərbələr endirmək də daxil olmaqla istənilən yolla özünü müdafiə edəcək. Dünya bu haqqı tanıyır"…

Təhlükəsizlik üzrə ekspert Sergey Şabovta qeyd edir ki, Rusiyada hərbi obyektlərdə baş verən partlayışlar və yanğınlar diversantların işi ola bilər. Hərbi ekspert Oleq Jdanov hadisələrin Rusiyanın özü tərəfindən təşkil edildiyini istisna etmir.

Jdanovun fikrincə, Rusiya Federasiyası ərazisində silsilə partlayışlar və yanğınlar Ukraynanı hücumda ittiham etmək və sonradan hərbi vəziyyətin tətbiqi və ölkədə "Rusiyanı qorumaq üçün səfərbərlik elan etmək" məqsədi ilə Kremlin təxribatı ola bilər"

Ekspert qeyd edir ki, Rusiya ordusunun Ukraynada döyüş əməliyyatlarında iştirak edən qüvvələri tükənmək üzrədir və qarşıya qoyulan hərbi tapşırıqları yerinə yetirmək üçün Rusiyaya daha çox əsgər lazımdır. Bunun üçün isə ümumi səfərbərlik elan etmək lazımdır.

Telegramda izləyin