"Üçtərəfli görüş İrəvana təsir üçün yaxşı platforma ola bilər" - Deputat

"Brüssel prosesinin yekunu olaraq, Azərbaycanın irəli sürdüyü 5 şərtin Ermənistan tərəfindən qəbul etdilməsi bölgədə sülh və əməkdaşlıq üçün imkanlar meydana çıxarıb".

Sonxeber.az xəbər verir ki, bunu milli məclisin deputatı Bəhruz Məhərrəmov Azərbaycan, Ermənistan və Rusiya rəsmilərinin bu ay baş tutacaq görüşünü şərh edən zaman deyib.
Onun sözlərinə görə, Azərbaycanın səyləri nəticəsində İrəvan Bakının şərtlərini qəbul etdiyini bildirərək delimitasiya və demarkasiya prosesinin həyata keçirilməsi üzrə işçi qrupun formalaşdırılmasına və konkret addımların atılmasına razılıq verib:

"Paralel olaraq davam edən Soçi-Moskva proseslərinin də mahiyyəti Brüssel prosesi ilə üst-üstə düşür. Görünən odur ki, cənab İlham Əliyev böyük siyasi qətiyyət və diplomatik məharət göstərərək, nə qədər mürəkkəb olsa da, Qərblə Rusiyanın mövqelərini bu məsələdə uzlaşdıra bilib. Bu mənada Azərbaycan, Ermənistan və Rusiya Baş nazir müavinlərinin üçtərəfli mümkün görüşləri də məhz rəsmi Bakının beynəlxalq hüquqa əsaslanaraq irəli sürdüyü şərtlərin icrasına yönəlib.

30 illik münaqişə periodu, işğal və vandalizm faktoru, azərbaycanlılara qarşı çoxsaylı soyqırımı faktları, habelə Ermənistanda illərlə davam edən mürtəce ideologiya və ərazi iddiaları fonunda, təbii ki, yekun sülhə və birgəyaşayışa nail olmaq asan məsələ deyil. Lakin Azərbaycanın hərbi-siyasi qələbəsi, bölgədə güc nisbətinin bizim xeyrimizə köklü dəyişməsi Ermənistana Azərbaycanın ərazi bütövlüyün, beynəlxalq sərhədlərinin toxunulmazlığını tanımaqdan başqa yol buraxmır.

Bu məqsədlə, təmaslar çətin bir proses olan sərhədlərin delimitasiyası və demarkasiyası prosesi ilə bağlı siyasi iradənin möhkəmləndirilməsi baxımından vacibdir. Habelə, bölgədə münaqişənin yenidən alovlanmaması üçün, Azərbaycanın da şərt olaraq irəli sürdüyü kimi, dövlətlərin bir-birinə qarşı ərazi iddialarının olmamasının qarşılıqlı təsdiqi və gələcəkdə belə bir iddianın qaldırılmayacağına zəmanət üçün, qarşılıqlı təhlükəsizliyə hədə törətmək, siyasi müstəqillik və ərazi bütövlüyünə qarşı hədə və gücdən istifadə etmək kimi BMT Nizamnaməsinin məqsədlərinə uyğun olmayan aktlardan çəkinməyə dair hüquqi öhdəlik götürməsi vacibdir.

Hesab edirəm ki, müvafiq görüşlər bu barədə real addımlar üçün imkanlar yaradır. Bundan başqa, məlumdur ki, 10 noyabr və 11 yanvar bəyanatlarına müvafiq olaraq, nəqliyyat və kommunikasiyaların açılışı keçmiş münaqişə tərəfləri qarşısında öhdəlik kimi müəyyən edilib. Azərbaycan Prezidenti dəfələrlə bu öhdəliyə sadiq olduğumuzu bəyan edib, hətta qısa müddət ərzində Azərbaycan öz ərazisinə düşən hissədə kommunikasiyaları tamamlamaq üzrədir. Bu mənada üçtərəfli görüş həm də bu prosesi ləngidən İrəvana təsir üçün yaxşı platforma ola bilər ki, müvafiq kommunikasiyaların və qarşılıqlı maraq doğuran digər sahələrdə əməkdaşlığın qurulması ilə regionda əməkdaşlıq mühiti formalaşsın.

Təbii ki, bütün bu proseslərin reallaşdırılması bir görüşlə mümkün deyil, amma hər bir təmas yekun məqsəd üçün yaxşı imkandır".

ZAİRA AKİFQIZI

Telegramda izləyin