"Bayraktar" PUA-larının Vətən müharibəsində rolu barədə AÇIQLAMA

Türkiyənin istehsal etdiyi "Bayraktar TB2" pilotsuz uçuş aparatları (PUA) Vətən müharibəsində mühüm rol oynayıb. Bu müharibədə əldə etdiyimiz şanlı zəfər nəticəsində "Bayraktar"ın gücü bütün dünyaya məlum olub.

Bəs bu PUA-ların İkinci Qarabağ Müharibəsində rolu nədən ibarət olub?

Mövzu ilə bağlı Sonxeber.az saytına hərbi şərhçi Ramil Məmmədli açıqlama verib.

"Müasir müharibə taktikasında texnologiyalara həddindən artıq çox yer verilir. Texnologiyaların müxtəlif formatı var. Bunlardan biri də hər birimizin pilotsuz uçuş aparatı kimi tanıdığı PUA-lardır.

Vətən müharibəsində "Bayraktar TB2" pilotsuz uçuş aparatlarından çox uğurla istifadə edilib. Yerüstü qurğuların, hərbi təyinatlı vasitələrin sıradan çıxarılmasında, hava döyüşlərində PUA-ların uğuru danılmazdır".

Ramil Məmmədli bildirib ki, bu PUA-lar düşmənin həm zirehli texnikasını, həm də canlı qüvvəsini sıradan çıxarmaqla yerüstü əməliyyatların sürətli şəkildə həyata keçirilməsinə öz dəstəyini verib:

"Təbii ki, birmənalı olaraq deyə bilmərik ki, Vətən müharibəsində əldə olunan uğur yalnız "Bayraktar"larla əlaqədardır. Bu, əsla elə deyil. Sadəcə olaraq, müəyyən istiqamətlərdə əməliyyatların tezləşdirilməsi, Xüsüsi Təyinatlı Qüvvələrin dəstəklənməsi baxımından bu PUA-ların önəmi böyükdür. Bu gün də Ukrayna ilə Rusiya müharibəsi zamanı PUA-lardan uğurla istifadə olunur".

AYSEL QULİYEVA

Telegramda izləyin