Rusiya ilə Ukrayna arasında UÇURUM DƏRİNLƏŞİR...

Təcavüzkar dövlətin musiqisi və müğənnilərinin Ukraynaya qastrol səfərləri qadağan edilib...

Rusiyanın Ukraynaya qarşı təcavüzünü pisləyənlər istisnadır...

Ukrayna Ali Radası Rusiya musiqisinin Ukrayna KİV-lərində və ictimai məkanda yayımını qadağan edən qanun qəbul edib.

Bu barədə "Səs" fraksiyasından deputat Yaroslav Jeleznyak özünün Telegram-kanalında məlumat verib.

Qanuna görə, "1991-ci ildən sonra Ukrayna Ali Radası tərəfindən təcavüzkar dövlət kimi tanınan dövlətin vətəndaşı olmuş və ya olan kişi (qadın) müğənni tərəfindən qeyri-dramatik mətni olan musiqi əsərlərinin lent yazısı olan fonoqramların, videoqramların və musiqi kliplərinin Ukrayna ərazisində açıq ifası qadağan edilir".

Ukraynanın Ali Radası Rusiyanı 2015-ci ildə "təcavüzkar dövlət" kimi tanıyıb.

Ali Radanın Reqlament məsələləri üzrə alt komitənin sədri Pavel Frolov özünün Telegram-kanalında göstərib ki, bu gündən Rusiya vətəndaşları olan müğənnilərin (Ukraynaya qarşı təcavüzü pisləyən və müvafiq siyahıya düşənlərdən başqa) qastrol tədbirləri qadağan ediləcək.

Bu zaman parlament Ukrayna dilində radioda mahnıların həcmini 40 faiz, xəbərlər və əyləncəli proqramların həcmini isə 75 faizədək artırıb./Moderator

Telegramda izləyin