"Jurnalistin birinci problemi azadlıqdır" - Ələsgər Məmmədli

Bu gün Azərbaycan Milli Mətbuatının yaranmasından 147 il ötür. Hazırda Azərbaycan jurnalistinin başlıca problemi nədir?
Bununla bağlı Sonxeber-a danışan media eksperti Ələsgər Məmmədli bildirib ki, jurnalistlərin təhlükəsizliyi ciddi risk altındadır:
"Jurnalistika üçün mühim olan bir neçə aspekt var ki, bunlar olmadıqda problem yaranır. Birincisi azadlıqdır. Jurnalist azad mühit əldə etməlidir ki, informasiya toplaya bilsin. Azadlığa gedən yol həm də maddi müstəqillikdən keçir. Jurnalistikanın maliyyə imkanları çox aşağıdır. Bu da ikinci problemdir. Ölkədəki ümuminkişaf tendensiyasına baxdıqda jurnalistika ən aşağı səviyyədə olan sahələrdəndir. Ölkənin iqtisadi baxımdan əz zəif olduğu dönəmdə medianın reklam bazarı indikindən yüksək idi.
Üçüncü problem budur ki, jurnalistlər ictimai informasiya əldə etmək və cəmiyyəti maarifləndirmək üçün fəaliyyət göstərilər. Amma onların qorunaqlığı, yəni jurnalist təhlükəsizliyi ciddi risk altındadır. Xüsusilə də jurnalistlərə qarşı baş verən pozuntuların hüquqi araşdırılması və məhkəmə müdafiəsində ciddi dəyişiklik var. Son vaxtlar narahat edən bir məqam da jurnalistlərin fəaliyyət imkanlarının məhdudlaşdırılmasına yönəlik müddəaların qanunvericiliyə gətirilməsidir. Ümid edirəm ki, bu qanun tətbiq olunmaz və problem aradan qalxar.Amma olduğu kimi tətbiq olunsa, yaxın bir ildə hətta indiki medianı axtaracağıq".

Şəbnəm Lətifi

Telegramda izləyin