Azərbaycanlı cüdoçu koronavirusa görə yarışlardan kənarlaşdırılıb

24-28 avqust 2022-ci ildə keçiriləcək yeniyetmələr arasında Dünya çempionatında 52 kq. çəki dərəcəsində çıxış etməsi planlaşdırılan Fidan Qasımovanın PCR testi pozitiv olduğu üçün Beynəlxalq Cüdo Federasiyası (BCF) tərəfindən yarışlardan kənarlaşdırılıb.

Sonxeber.az report-a istinadən xəbər verir ki, BCF-in tətbiq etdiyi protokola uyğun olaraq, yarışa gələn idmançılar ilk növbədə sürətli antigen testi verməlidirlər. Fidan Qasımovanın birinci antigen testi pozitiv çıxdıqdan sonra yenidən antigen testi olunub.

İkinci antigen testinin cavabı da pozitiv çıxdığına görə üçüncü dəfə də PCR testi olunub və testin cavabı pozitiv çıxdığı üçün təəssüf ki, yarışlardan kənarlaşdırılıb.

İdmançımız hazırda yarışların keçirildiyi Bosniya və Herseqovinanın tətbiq etdiyi qaydalara əsasən karantinə alınıb. Özünü yaxşı hiss edir və daimi həkim nəzarəti altındadır. İdmançının tezliklə sağalması və Vətənə qayıtması üçün ACF tərəfindən bütün lazımi tədbirlər həyata keçirilir.

Telegramda izləyin