Ermənilər niyə məhz Kəlbəcəri hədəfə alıblar? - Deputatdan AÇIQLAMA

"Ermənistanın Kəlbəcər istiqamətində atəşkəs rejimini tez-tez pozması təsadüfi xarakter daşımır. Kəlbəcər Ermənistandan Qarabağa gedən iki yoldan biridir. Kəlbəcər yolu dağlıq olub, Laçın dəhlizindən daha qəliz yol sayılsa da, keçmiş DQMV-nın şimal ərazilərinə daha tez çatmağa imkan verir. Vətən müharibəsində qələbəmizdən sonra Azərbaycan nəqliyyat-kommunikasiya əlaqələrinin bərpası kontekstində Kəlbəcər yolunun Ermənistan və Qarabağ erməniləri üçün açılmasına razılıq vermişdi. Kəlbəcər yolunun açılması Ermənistandan Qarabağın şimal ərazilərinə yolu 500 km-dən 50-60 km-ə qədər qısalda bilərdi. Amma kommunikasiya əlaqələrinin bərpa edilməsinə can atmaq əvəzinə, Ermənistan vərdiş etdiyi davranışa sadiq qalaraq zorakı yollara üstünlük verib Kəlbəcər istiqamətində təxribatlar həyata keçirməyə başladı və bu gün də bunu məqsədli şəkildə davam etdirir".

Bu fikirləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat bildirib ki, Ermənistanın təxribatlar üçün Kəlbəcər istiqamətini seçməsi hərbi məntiqi özündə təcəssüm etdirir:

"Kəlbəcərin Ermənistan tərəfindən I Qarabağ müharibəsi zamanı işğalı ermənilərə cəbhə xəttini bir neçə yüz kilometr qısaltmağa imkan verdi. Əgər buna qədər ermənilər Laçın, Basarkeçər və Ağdarə istiqamətində çoxlu canlı qüvvə və hərbi texnika saxlamağa məcbur idilərsə, Kəlbəcərin işğalından sonra onlar cinahlardan birini "təhlükəsiz" edib, qüvvələri digər cinahlar üzrə cəmləşdirə bildilər. Kəlbəcərin II Qarabağ müharibəsindən sonra geri qaytarılması Azərbaycan üçün böyük qələbə, Ermənistan üçünsə strateji itki oldu. Kəlbəcər həm də Azərbaycanla Ermənistanın yüksək dağlıq ərazili sərhəd rayonlarından biridir. Kəlbəcərin Camışdağ və Dəlidağ zirvələrinin hündürlüyü 3500 metrdən çoxdur. Bu zirvələrə nəzarət Azərbaycana Ermənistanla sərhəddə strateji üstünlük bəxş edir. Kəlbəcərin strateji əhəmiyyətini unutmayan Ermənistan Kəlbəcər ilə sərhəddə böyük qüvvələr saxlayıb, onu daima atəşdə saxlamağı vacib bilir".

Fikirlərinin davamı olaraq, millət vəkili Tamam Cəfərova qeyd edib ki, Ermənistanın təxribatlar üçün Kəlbəcər istiqamətini seçməsinin iqtisadi məntiqi də var:

"Ermənistan I Qarabağ müharibəsi zamanı Kəlbəcəri işğal etməklə Söyüdlü (Zod) və 13 tondan artıq qızıl ehtiyatlarına malik Ağduzdağ və Tutxun yataqlarını ələ keçirib. Kəlbəcərin azad edilməsi bu qızıl yataqlarının Azərbaycanın nəzarətinə qayıtmasını şərtləndirdi. Dünya iqtisadi böhranı və Qərb dövlətlərinin Rusiya qızılına tədbiq etdiyi embarqo şəraitində dünya bazarlarında digər ökələrdən olan qızıla tələbat artıb. Azərbaycanın mədən işlərini bərpa etmək və bu yataqlardan gəlir əldə etməsinə mane olmaq üçün Ermənistan Kəlbəcərdə gərginliyin yüksək səviyyədə saxlanmasına çalışır.

Xatırladaq ki, Kəlbəcərin turizm baxımından gözəl təbiəti, əlverişli relyefi və zəngin mineral suları var. Meşələrin ümumi sahəsi isə təxminən 30 min hektardır. Yuxarı İstisu və Aşağı İstisu müalicəvi təsirə malik mineral su yataqlarıdır, Alagöllər, Qaragöl, Zalxa gölü və s. su hövzələri isə turizmin inkişaf etdirilməsi üçün münasib ərazilər hesab olunurlar. Kəlbəcərin relyefi heyvandarlığın, iqlimi isə üzümçülüyün, tütünçülüyün və tərəvəzçiliyin inkişafı baxımından əlverişlidir. Kənd təsərrüfatı və turizm həm Kəlbəcərin, həm də Şərqi Zəngəzurun bərpa olunmasında aparıcı rol oynaya bilər".

Deputat vurğulayıb ki, iqtisadi inkişaf azad edilmiş ərazilərə məcburi köçkünlərin qayıtmasını tezləşdirə bilər:

"Kəlbəcərin 77 minlik əhalisinin təxminən yarısı Gəncə, Bakı və Goranboyda yaşayır. İqtisadi dirçəliş əhalinin öz yurduna qayıtmasına və ölkə daxilində demoqrafik mobilliyinin artmasına şərait yaradacaq. Turizmin inkişafı əcnəbi turistlərin də Kəlbəcərə axın etməsinə və Azərbaycan iqtisadiyyatının inkişafına kömək edəcək.

Azərbaycanla rəqabəti özünə məqsəd seçən Ermənistan, təbii ki, Azərbaycan iqtisadiyyatının daha da inkişaf etməsinə və güc balansının Bakının xeyrinə daha da dəyişməsinə imkan vermək istəmir. Güc balansının Ermənistanın xeyrinə dəyişməsi mümkün olmadıqda yeganə variant qarşı tərəfin inkişafına mane olmaq qalır.

Xüsusilə onu da qeyd etməliyik ki, Ermənistan və Qarabağa axan çayların əksəriyyəti Kəlbəcər üzərindən keçir. Kəlbəcərin Azərbaycanın nəzarətində olması Qarabağa və Ermənistana gedən su resurslarına nəzarət etmək baxımından vacib əhəmiyyət kəsb edir. Bu, Azərbaycana Ermənistan və separatçıların qalıqları üzərində əlavə təsir mexanizmləri bəxş edir".

Aysel Yusifqızı

Telegramda izləyin