Məktəblər açılır: TIXACLARla necə mübarizə aparaq? - Ekspertdən AÇIQLAMA

Son günlər Bakının mərkəzi küçə və prospektlərində sıxlıq və tıxac müşahidə olunur. Bunun əsas səbəblərindən biri də yeni tədris ilinin başlaması ilə bağlıdır.

Yollarda olan tıxaclar xüsusilə pik saatlarda nəqliyyat vasitələrinin rahat hərəkətini ləngidir. Bəs Bakının bitməyən tıxac problemi necə həll olunmalıdır? Bunun qarşısını almaq üçün hansı tədbirlər görülməlidir?

Məsələ ilə bağlı BiG.AZ-a danışan yol və nəqliyyat eksperti Rauf Ağamirzəyev bildirib ki, ilk növbədə, avtobus zolaqlarının qurulması və tənzimlənməsi həm sıxlığın qarşısını alacaq, həm də ictimai nəqliyyata meyilliyi artıracaq:

"Burada eyni yol sahəsinin optimal istifadəsindən söhbət gedir. Yəni eyni yolda eyni anda neçə avtomobilin yox, neçə sərnişinin daha sürətli daşınması əsasdır.

İlkin mərhələdə ayrılmış avtobus zolaqlarına nəzarət çox zəif oldu, şəbəkə genişlənmədi. Belə ki, avtobus zolaqları olduğu halda avtomobil tıxacda olsa belə, avtobus dayanmamalıdır, hərəkət etməlidir. Yəni eyni anda daha çox sərnişini sürətli şəkildə A nöqtəsindən B nöqtəsinə çatdırmalıdır. Belə avtobus zolaqları olduğu halda, ümumi yolda sıxlıq olsa da, avtobusların fasiləsiz sürətli hərəkətinə şərait yaratmış olacaq. Bu da insanların prioritetinə təsir edəcək, ictimai nəqliyyatla səfər etməyə meyillilik artacaq.

Ceşidli ictimai nəqliyyat növlərinin inkişafı gündəmə gəlməklə yanaşı, artıq onun reallaşdırılması üçün işlər görülməlidir. Yüngül relsli dəmiryolu şəbəkəsi qurulmalıdır, tramvaylar, şəhərətrafı elektrik qatarı şəbəkəsi yaradılmalıdır. Elektrik qatarı şəbəkəsi qurulub şəbəkə genişləndirilməli, mövcud yolda qatar saatı artırılmalı interval azaldılmalıdır, metro şəbəkəsi inkişaf etdirilməlidir və bunlar arasında rahat keçid olmalıdır".

Ekspertin sözlərinə görə, Bakıda parkinq sisteminə də nəzarət gücləndirilməlidir:

"Daha sonra parkinq siyasəti əlverişli qurulmalıdır. Digər bir həll variantı kimi şəhərin girişində "Park and ride" – "park et və səyahəti davam et" sistemi olmalıdır. Burada sürücü öz avtomobili ilə şəhərə girmədən girişdə park edir və səfərinə ictimai nəqliyyatla davam edir. Bununla da biz sağlam ortama sahib ola bilərik. Yəni bunlar kompleks tədbirlərdir. Yolun genişləndirilməsi və digər tədbirlər sıxlığın qarşısını almaq üçün effekt verməyəcək. Yol genişlındikcə avtomobillərin sayı daha da artacaq. Ona görə yalnız yolun optimal istifadəsindən söhbət gedə bilər. Burada əsas amil eyni yol sahəsində eyni anda daha çox ictimai nəqliyyatla sərnişin daşınmasıdır. Sərnişinlərə də bu daha keyfiyyətli təqdim olunduğu halda hamı məncə razı qalacaq. Sadəcə bu bir günlük proses deyil, bunlar mərhələli sürətdə yaxın, orta və uzaq vədəli bir yol xəritəsi ilə icra olunmalıdır.

Ən sürətli təklif edə biləcəyimiz variant odur ki, mövcud yolumuz var və onun bir hisssəsini ictimai nəqliyyata verməliyik, günün istənilən saatında bu avtobus zolağı işləməlidir. Həmçinin, həmin avtobus zolağı da tam standarta uyğun olmalıdır. Bununla da bağlı statistika verilməlidir.

Real nəticələrə əsasən demək olar ki, Rəşid Behbudov küçəsində və Atatürk prospektində bu zolaqlar çox gözəl fəaliyyət göstərir. Həmin küçələr, prospektkər boyu daha sürətli və rahat getmək olur. Belə küçələrin sayı məhdud olmamaldır, bu, bütün şəhəri əhatə etməlidir. Bunlara əsadən də artıq müəyyən etmək olar ki, neçə avtobusun maksimum gücü nə qədərdir, ondan nə qədər istifadə edə bilirik. Bundan sonra alternativlər gündəmə gələ bilər".

Telegramda izləyin