"Azərsu" rəhbərliyindən xahiş etdim, həll olunmadı" - Rüfət Quliyev

Milli Məclisin deputatı Rüfət Quliyev iqtisadi siyasət, sənaye və sahibkarlıq komitəsinin iclasında "Azərsu"yu tənqid edib.
Mövzu ilə bağlı Sonxeber.az-a danışan deputat şikayətinin nədən ibarət olduğunu açıqlayıb. O bildirib ki, insanlar "Azərsu" ya müraciət edir, amma müəssisə problemlərini həll etmir:

"Lənkəranda 20-ə yaxın istehsalatla məsğul olan sahibkar var. Dövlət rəhbəri də tapşırıq verib ki, sahibkarlığa şərait yaratmaq lazımdır. Sahibkarlar müraciət edərək çirkab sularının axıdılmasından şikayət edir. "Azərsu" elə bir siyasət aparır ki, çirkab suların çıxarılması ilə bağlı problem var. "Azərsu" yun düsturu ilə hesablananda çirkab suyun qiyməti içməli sudan bahadır. Bu, absurddur. Əfsuslar olsun ki, "Azərsu" son 6 aydır buna heç fikir də vermir. Əzəldən bu qurumun rəhbəri işi görmək istəmir və ya təşəbbüs qəbul etmir. Millət vəkili olaraq bu, mənim qəbul etmədiyim məsələdir. "Azəriqaz" , "Azərişiq", "Azərenerji" nin heç birində bu qədər problem, şikayət yoxdur. İnsanlara güzəşt edirlər, sahibkar və adi insanlarla işləyirlər. "Azərsu" son 4 ildir işləmək istəmir. Zarafatla dedim ki, ömrümün yarısını "Azərsu" ilə mübarizəyə həsr etmişəm. Hər müəssisədə 2500 -3000 adam işləyir. "Azərsu" şərait yaratmalıdır ki, 5000 adam işləsin.
İkincisi, 4 aydan çoxdur Mərdəkanda bir tanış insan müraciət etdi ki,bağa suyu su maşınları ilə gətizdirir. 400 metr qıraqda su xətti gedir.Pulu da rəsmi formada ödəyir. Su xəttinin onun öz hesabına çəkilməsini istəyir. "Azərsu" rəhbərliyindən xahiş etdim, həll olunmadı.1-2 deputat da zəng edib müraciət etdi, yenə həll olunmur. "Hə,hə" deyib nömrəni götürürlər ki, əlaqə saxlayarıq, amma heç bir nəticə olmur. Qeyd etmək istəyirəm ki, "Azərsu" yun Lənkərandakı regional rəhbəri çox adekvat insandır. Amma elə məsələlər var ki, onun səlahiyyətində deyil. Onu artıq qurumun özü həll etməlidir. Regional rəhbərlərlə işləmək olur, amma bu mərkəzi aparatın niyə belə mövqe tutduğunu başa düşə bilmirəm. Vətəndaş Mərdəkandakı "Azərsu"dan pul, vəzifə istəmir. Vətəndaş deyir ki, pulunu ödəyirə, layihəni çək, borunu çək quraşdır bağıma, içməli su gəlsin. Belə faktlarla vətəndaşlar müəssisəyə müraciət edirlər, amma "Azərsu" həll etmir".

Şəbnəm Lətifi

Telegramda izləyin