Ən müasir metodlara əsaslanan Müasir Psixologiya Mərkəzinin lideri peşəkar klinik psixoloq Aidə Sübhan

Çoxumuz psixologiyanı filmlərdə gördüyümüz qədər bilirik, pasient gəlir, problemlərini danışır, psixoloq isə dinləyir və ona məsləhət verir. Təbii ki, psixologiya bu qədər sadə bir sahə deyil. İnsanın ruhi aləmini öyrənən elm necə sadə ola bilər deyilmi? Bunu bu sahə üzrə çalışan peşəkar psixoloqların illərlə aldığı təhsil də sübut edir. Müasir Psixologiya Mərkəzinin qurucusu klinik psixoloq Aidə Sübhan 15 ildir fəaliyyət göstərir, təhsilini artırmağa isə əsla fasilə vermir. O, bakalavr təhsilini Bakı Dövlət Universitetinin Psixologiya fakultəsində almış, 2007-ci ildə isə fərqlənmə diplomu ilə bitirmişdir.Magistratura təhsilini də yenə eyni universitetdə Hüquq Psixologiyası ixtisası üzrə davam etdirmiş və yenə eyni şəkildə fərqlənmə diplomu ilə təhsilini 2009-cu ildə başa vurmuşdur. Lakin təhsilini bununla yekunlaşdırmayaraq 4 ölkədə ixtisaslaşma keçmişdir. 2010-cu ildə Türkiyədə reabilitasiya üzrə ixtisaslaşmışdır. Həmçinin İran, Rusiya, İsraildə də distant olaraq autizmin müxtəlif metodları, reabilitasiyanın müxtəlif sahələri, sensor inteqrasiya məsələləri kimi sahələr üzrə təhsilini genişləndirmişdir. 2014-cü ildə isə Azərbaycan Respublikası Təhsil İnstitutunda klinik psixologiya üzrə doktoranturaya qəbul olmuşdur. Hazırda isə "Autizmli uşaqlar, onların diaqnostikası və korreksiya məsələsi" mövzusunda müdafiəyə hazırlaşır. Aidə xanım iş fəaliyyətinə də çox gözləmədən elə təhsilini başa vuran kimi 2007-ci ildə Bakı Dövlət Universitetində fəaliyyətinə başlamış, 3-4 il burada çalışmışdır. Daha sonra isə Bakı Qızlar Universitetində, Azərbaycan Pedaqoji Universitetində və Xəzər Universitetində müəllim olaraq fəaliyyət göstərmişdir. Hələ tələbə olduğu dönəmlərdən klinika açmağı, psixoloq kimi terapiyalar keçməyi qarşısına məqsəd olaraq qoyan gözəl xanım bu məqsədinə 2011-ci ildə nail olaraq Müasir Psixologiya Mərkəzinin əsasını qoymuşdur. Bu həmin dövr üçün olduqca cəsarətli bir addım idi. Mərkəzdə uşaq psixologiyası, ailə psixologiyası, psixoloji testləşdirmə, reabilitaiya və idman, fizioterapiya, qrup terapiyası kimi birdən çox sahə üzrə fəaliyyət mövcuddur. Bütün bu sahələr üzrə isə mərkəzin komandası şəbəkə halında çalışır və yekun nəticəni birgə əldə edirlər. Aidə xanım özü isə uzun illər uşaq inkişaf sahəsi üzrə ixtisaslaşmış, artıq 7 ildir ki, böyüklərlə işləyir. O, hipnoterapiya, psixosomatik metod, sexterapiya, ailə terapiyası üzrə ixtisasartırmalarda olmuşdur. Aidə Sübhan həmçinin böyük sosial layihələrdə də aktiv şəkildə iştirak edir. O, Müaqsir Psixoloji Dəstək İctimai Birliyinin sədri, həmçinin Emotion qrupun rəhbəridir. Qrup "Övladımın psixoloquyam", "Sevgi əngəl tanımaz", "Günəşə salam" kimi böyük layihələrinə imza atmışdır. Aidə xanımın fəaliyyətində şəhid və qazi ailələri, övladları ilə yaxından maraqlanmaq böyük yer tutur, o, bu fəaliyyətində "Xarıbülbül fidanları" qrupu ilə birgə irəliləyir. İndi isə onun məqsədlərindən əsası elmi sahə üzrə addımlar atmaq, böyük konfranslar təşkil etməkdir. Aidə Sübhan hər zaman bu fikri müdafiə edir ki, psixoloqlar da insandır və mükəmməl olmaq məcburiyyətində deyillər.Aidə xanım isə mükəmməl bir klinik psixoloqdur və çalışmaları ilə Azərbaycana faydalı olma üçün hər zaman öz üzərində işləyir.

Telegramda izləyin