Bahalaşan dönərin keyfiyyəti necə olacaq? - AÇIQLAMA

Xəbər verdiyimiz kimi, Azərbaycanda dönərin qiymətində dəyişiklik olub. Buna səbəb dönər üçün nəzərdə tutulan toyuq ətinin qiymətinin bahalaşmasıdır. Belə ki, əvvəl bu qiymət bir kiloqram üçün 5 manat 50 qəpik təşkil edirdisə, hazırda dönər üçün toyuq ətinin 1 kilosunun qiyməti 6 manat 50 qəpik olub.

Məsələ ilə bağlı Azad İstehlakçılar Birliyinin sədri Eyyub Hüseynov BiG.AZ-a açıqlamasında bildirib ki, çox az miqdarda malların qiyməti dövlət tərəfindən tənzimlənir:

"Dərman preparatları və bir neçə kommunal xidmətlərdən başqa, qalan qiymətlər dövlət tərəfindən tənzimlənmir. Dövlətin bu işlərə müdaxilə etmək ixtiyarı yoxdur. Azad bazar iqtisadiyyatıdır, kim nəyi neçəyə istəyirsə, sata bilər. Lakin quş yeminin bahalaşması, maya dəyərinə təsir edən amillər, qonşu ölkələrdə gedən müharibələr, kommunikasiyaların zəifləməsi və s. amillər quşçuluq təsərrüfatında ətin qiymətinin bahalaşmasına gətirib çıxarır. Ona görə, dönərlərin qiymətinə də bu bahalaşma mütləq təsir edəcək.

Ümumiyyətlə, dönər hazırlayıb satmaq üçün ölkədə iki müəssisəyə icazə verilib. Çünki həmin müəssisələrdə şok dondurma aparatı var. Burada ət -40 dərəcə şok dondurmadan keçirilir, şişə taxılır və soyuducuda dönərxanalara verilir. Dönərxanalar oradan heç bir faiz belə almırlar. Bu şəraitdə xammalın qiyməti artdığı üçün dönərin keyfiyyəti aşağı düşəcək, qiyməti də qaxacaq".

E.Hüseynov qiymət artımı zamanı keyfiyyətin aşağı düşməsi məsələsinə toxunaraq bunu da əlavə edib:

"Keyfiyyət ona görə aşağı düşür ki, əhali ucuz qiymətə almağa öyrəşib. Əlbəttə, satıcı istəyir ki, qiyməti sabit saxlasın, qaldırmasın. Bunun üçün də sahibkarlar məcburdular ki, qiymət artanda dönəri keyfiyyəti aşağı olan ətdən hazırlasınar, çəkini azaltsınlar. Bu, biznesin qanunlarıdır. Lakin sonda onsuz da məcbur olub qiyməti qaldıracaqlar. Bu, bazar iqtisadiyyatıdır, belə də olmalıdır".

Telegramda izləyin