"Nə qədər təqlid etsələr də, Vaqif Mustafazadə olmayacaqlar"

"Almaniyada yaşayıram, amma ürəyim, ruhum hələ də İçərişəhərdədir. Orada doğulmuşam və böyümüşəm. Onu dəyişdirmək olmaz. Bakıya gələndə hisslərim çox qarışıq olur: Bu, nostalji, sonsuz sevgi, ağrı, xatirələrdir. Oğlum Bakını dəli kimi sevir. Maynzda doğulub, amma deyir ki, Bakıda doğulmuşam. Ona söyləyirəm ki, oğul, mən və atan Bakıda doğulub. Amma sən Maynzdansan. Mənə cavab verir ki, bəli, Maynzda anadan olmuşam, amma mən də Bakıda doğulmuşam".

Axşam.az xəbər verir ki, bu sözləri əfsanəvi caz ifaçısı Vaqif Mustafazadənin qızı, Xalq artisti Əzizə Mustafazadə deyib. Caz ifaçısı "Nargiz" dərgisinə müsahibə verib. O, jurnalın baş redaktoru Ülviyyə Mahmudovanın suallarını cavablandırıb.

Ə.Mustafazadə "Atanız deyirdi ki, dünya musiqi ilə xilas olacaq" sözlərinə belə cavab verib:

"Düzdür, mübahisəedilməzdir. Musiqi yumor hissidir. Yumor sağlam və əyləncəli olmalıdır, pozitiv olmalıdır. Mənim devizim budur. Dostlara hər zaman vaxt tapmaq lazımdır. Hər şeyi atıb, onların yanına gedə bilərsən. Gecə saat 3-də də onların köməyinə qaçmalısan. Vaxtımı dostlarıma, ailəmə sərf etməyi sevirəm".

Atasının ölümündən danışan ifaçı həmin anlar yaşadığı çətinlikləri belə dilə gətirib:

"Fəlakət idi... Mən də, Elza xanım da (anası - red.) depressiyaya düşdük. Belə günəşli bir insanın olmaması... Vaxt sağaltmır, hələ də acı çəkirik. Bu, qətiyyən doğru deyil. Ruhdan axan qan heç vaxt laxtalanmaz. Həmişə qanaxır. Mən bununla bağlı heç nə edə bilmərəm. Evə getdim və ilk işim atamın köynəyini axtarmaq oldu. Üç gündən sonra on yaşım tamam oldu. Bu, Daşkənddə baş verib. Mənə dəqiq məlumatı Elza xanım dedi. Bu, Corc Gerşvenin "Sevdiyim adam" pyesi idi. Bu atamın məktəbli ikən doqquz yaşında ifa etdiyi ilk caz parçası idi. Atam Gerşveni çox sevirdi. Anam mənə hər şeyin necə baş verdiyini ətraflı izah etdi. İndiki kimi yadımdadır, ayın 15-də atamla danışdım. Soruşdum ki, qayıdacaqsan? Cavab verdi ki, ad gününə kimi mütləq qayıdacam".

Vaqif Mustafazadənin yaradıcılığından danışan caz ifaçısı bunları əlavə edib:

"Vaqifdən bir daha olmayacaq. Vaqif təkdir. O, böyük insandır. Özümdən razı deyiləm. Biz daha çox işləməliyik. Nə qədər təqlid etməyə və onun kimi olmağa çalışsalarda da, onun kimi olmayacaqlar. Atam həmişə deyirdi ki, öz esseni yazıb üç almaq daha yaxşıdır, nəyinki başqasından beş almaq. Bir şeyin fərqindəyəm ki, ikinci Vaqif olmayacaq. Atamın "Bakı gecələri" musiqisini dinləmək mənim üçün çox çətindir. Xüsusilə, atamın ifasında xalq musiqisini dinləmək mənə daha da çətindir və ağrılıdır. Məndə dəhşətli nostalji hisslər oyadı".

Oğlundan danışan Ə.Mustafazadə "Oğlum pianoda 5 dəqiqə ifa edir. Onu buna məcbur etmirəm. Uşağı məcbur edən valideynlərə qarşıyam. Uşaqdır, istəyər ifa edər, istəyər oynayar. Mənimlə birlikdə ifa etməyi sevir" sözlərini söyləyib.

Telegramda izləyin