"Səfirliyin avtomobilinin atəşə tutulmasının siyasi və kriminal tərəfi var" - ŞƏRH

Bu il oktyabrın 10-dan 11-nə keçən gecə Azərbaycan Respublikasının Vaşınqtondakı səfirliyinin xidməti avtomobilinə atəş açılıb. Baş vermiş hadisə ilə bağlı diplomatik nümayəndəliyimiz tərəfindən dərhal ABŞ müvafiq qurumlarına məlumat verilib, kamera görüntüləri qarşı tərəfə təqdim edilib.

Məsələ ilə əlaqədar ABŞ-ın ölkəmizdəki müvəqqəti işlər vəkili 12 oktyabr tarixində XİN-ə çağırılıb:

"Baş vermiş hadisə ilə bağlı ciddi narahatlığımız və narazılığımız ifadə edilib və Azərbaycan diplomatik nümayəndəliyinin təhlükəsizliyinin təmin edilməsi tələbi qarşı tərəfin diqqətinə çatdırılıb".

Mövzunu politoloq Azər Qasımlı şərh edib. O bildirib ki, bu tipli məsələlərin həm kriminal həm siyasi tərəfi var.

"Kriminal tərəfi ondan ibarətdir ki, Azərbaycan tərəfi bunu araşdırmalıdır. Bunu həm Azərbaycan tərəfi, həm də səfirliyin yerləşdiyi ölkənin digər rəsmi orqanları bu haqda məlumat verməlidir. Siyasi tərəfi isə ondan ibarətdir ki, bu səfirliklərə qarşı olan hərəkətlər yeni deyil. ABŞ-da səfirlikdə olan bu insident onu deməyə əsas verir ki, müəyyən bir trend yaranıb. Ola bilsin ki, planlı şəkildə həyata keçirilən aksiyalardır. Bu kimi insidentlərin baş vermə məqsədi qorxutmaqdır, nədənsə ola bilsin çəkindirməkdir".
AYSEL QULİYEVA

Telegramda izləyin