MİQ imtahanı ləğv olunur?

Milli Məclisin deputatı Siyavuş Novruzov müəllimlik ixtisasını bitirənlər üçün işə qəbul zamanı əlavə imtahanların ləğvini tələb edib.
"Hər il qanunvericilikdə dəyişiklik edilir, dərsliklər yenilənir. Nəzərə almaq lazımdır ki, ölkədə 200 minə yaxın müəllim var. Ali məktəbi bitirən kimi iş tapmaqdan ötrü gərək həmin şəxs yenə test imtahanından keçsin. Başqa qurumlar da imtahan təcrübəsini tətbiq edir. Xaricdə diplomu təqdim edib iş tapa bilməyən şəxs Harvardı belə məhkəməyə verir. Universitet tələbədən oxuduğu 4 il müddətində təhsil haqqını alıb amma lazımi biliyi verməyib? Bəs elədirsə niyə onda diplom verirlər? Hər yerdə müəllimin qədri bilinməlidir. Qanunvericilikdə təkmilləşdirmə aparılmalıdır ki, insanların rahatlığını təmin edək" ,- deyə deputat qeyd edib.

Azərbaycan Gənc Alim, Doktorant və Magistrlar Cəmiyyətinin sədri İlqar Orucov Sonxeber.az-a bildirib ki, o Siyavuş Novruzov ilə eyni fikirdə deyil. Dövlət sifarişi ilə minlərlə insan müəllim ixtisasına yiyələnirlər, onların hamısını işlə təmin edə bilmərik. Diplom işə qəbul üçün əsas ola bilməz. Əmək bazarının tələbi özünü inkişaf etdirməkdir:

"Mən Siyavuş müəllimin fikri ilə razılaşmıram. Pedaqoji Universiteti bitirənlər Müəllimlərin işə qəbul imtahanında (MİQ) iştirak edirlər. Nəticələrə baxsaq, görərik ki, iddiaçıların heç də hamısı yüksək nəticə göstərmir. Ümumiyyətlə əmək bazarının tələbləri var. MİQ imtahanında şəffaflıq varsa, niyə gələcəkdə müəllim olmağı düşünən insan imtahanı problem kimi görməlidir? Müəllimlərin imtahandan keçirilərək işə götürülməsi doğru qərardır. Elm və təhsil nazirliyi yanında İctimai Şuranın üzvü olaraq daim monitorinq edirik. İmtahana qatılan gənclərlə söhbət edirik. Açığı, kifayət qədər gənclər görmüşəm ki, bu prosesdən narazı deyillər, əksinə, məmnundurlar.İmtahan şəraiti hamı üçün eynidir. Hörmətli Siyavuş müəllimə demək istəyirəm ki, dövlət sifarişi ilə minlərlə insan müəllim ixtisasına yiyələnirlər, biz onların hamısını işlə təmin edə bilmərik. Düşünürəm ki, müəllim olaraq seçilən insanlar ən yaxşılardan da yaxşı olmalıdır.
Mən bir neçə ölkədə MİQ imtahanını araşdırmışam. Finlandiya ən yaxşı təhsil sistemi olan ölkədir. Orada xüsusi müsabiqədən keçərək müəllim olurlar. Mən istisna etmirəm ki, Azərbaycan ali təhsil müəssisələrində savadlı insanlar təhsil alır. Amma qırmızı diplom məsələsi sadəcə Azərbaycanda var. Mən də qırmızı diplomla bitirmişəm . Amma qırmızı diplomlu insanlara nə zaman güzəşt olunub? Tutaq ki, rəqabət şəraitində 2 nəfər eyni balı toplayıbsa, yalnız o halda güzəşt olunur. Mən MİQ-lə bağlı ən sərt qərarların qəbulunun tərəfdarıyam. Çünki təhsilin keyfiyyətində problem varsa, bu birbaşa müəllim faktoruna bağlıdır. Orta məktəb müəllimlləri nə qədər savadlı olacaqlarsa, təhsil inkişaf edəcək. Elə müəllimlər var ki, biliyi yetərincə deyil. Saxta diplomlu müəllimlər var. Mikayıl müəllim nazir təyin olunanda bir qismini uzaqladırdı. Amma hələ də var. MİQ prosesinə qeyri-ciddi yanaşa bilmərik. Müəllimlər 5 ildən bir diaqostik qiymətləndirmədən keçməlidirlər. Əmək bazarının tələbi budur ki, daim öz üzərində işləməlisən".

Şəbnəm Lətifi

Telegramda izləyin