Mehman Əfsanənin "iPhone" işlətməsindən şübhələnib - Arvadını öldürən iş adamına ağır cəza + FOTO

Goranboyda arvadını maşınla vurub daha sonra bıçaqla öldürən iş adamı Mehman Süleymanovun məhkəmə prosesi başa çatıb.

"Qafqazinfo"nun əldə etdiyi məlumatına görə, Gəncə Ağır Cinayətlər Məhkəməsinin hökmünə əsasən, M.Süleymanov 17 il müddətinə azadlıqdan məhrum edilib.

Qeyd edək ki, hadisə bu ilin martın 24-də qeydə alınıb.

Məhkəmə iclasında təqsirləndirilən şəxs qismində dindirilən M.Süleymanov ifadəsində bildirib ki, qətlə yetirdiyi arvadı Əfsanə Məmmədova həm də onun xalası qızı olub.

Cütlük 2003-cü ildə ailə həyatı qurub və onların bu evlilikdən üç övladı dünyaya gəlib.

Mehmanın sözlərinə görə, evli olduqları müddət ərzində onun Əfsanə Məmmədova ilə dəfələrlə ailədaxili söz-söhbətləri olub. Tərəflər arasında ən ciddi münaqişələrdən biri də 2019-cu il mayın 28-də baş verib. Belə ki, yaranmış mübahisə nəticəsində Mehman qayçı ilə Əfsanəyə 4-5 dəfə zərbə endirib.

Həmin vaxt M.Sülehmanov Bakı Ağır Cinayətlər Məhkəməsinin hökmünə əsasən, 3 il müddətinə azadlıqadan məhrum edilib, daha sonra bu cəza 2 il sınaq müddəti ilə əvəz olunub.

Cütlük arasında növbəti mübahisə isə Mehmanın öz bacılarına maddi yardım etməsi üstündə baş verib. Bu hadisədən sonra təxminən 10 gün bir-birilərini danışdırmayıblar. 10 gün sonra isə axşam saatlarında Mehman işdə olduğu zaman ortancıl oğlu ona zəng edərək anasının evdən getdiyini bildirib.

Bundan sonra o, Əfsanəni "Whatsapp"da bloka atıb. Əfsanə isə "Instagram"da onunla bağlı paylaşımlar edib. Bundan sonra isə kiçik oğlu "Whatsapp"da atasına səsli mesaj ataraq bu məsələdə onu qınayıb.

Bundan başqa, o bir-iki dəfə qaynı Mehmanı götürüb işə aparmaq üçün baldızı Nurtəkinin şirniyyat sexinə gedib. Həmin vaxtlar Nurtəkinlə Əfsanə də danışmayıblar. O, Mehmanı götürməyə getdiyi zaman Nurtəkin ona "Neyləyirsən Əfsanəni? Başını burax getsin, eşitdiyimə görə maşın almaq istəyir", - deyib.

Mehman Nurtəkinin bu sözlərinə inanmaq istəməyib, lakin Əfsanənin "Instagram"da gəzdiyi yerlərin şəklini paylaşmağı, bundan başqa "iPhone 12" markalı telefon işlətməsi, kürk geyinməsi, işləmədən kirayədə qalmasını düşündükdə, Əfsanənin başqa biri ilə münasibətinin olduğunu fikirləşib.

Mehman həm də bu qənaətə gəlib ki, Əfsanə uşaqlarını atalarına qarşı öyrədib və onlara nalayiq sözlər dedirdib.

Bütün bu səbəblərdən o, Əfsanəni gördüyü yerdə öldürmək qərarına gəlib. O, bunu Əfsanənin qohumlarının yanında da deməkdən çəkinməyib.

18 mart 2022-ci il tarixdə o, qaynı Mehmanla birgə Bakıdan Ağdaşa, bacısı Zülfiyyəgilə qonaq gedib. Mehman Süleymanov daha sonra uşaqlarının Dəliməmmədli şəhərində olduğunu öyrənib. O, baldızına zəng edərək kiçik oğlunu görmək istədiyini bildirib. Lakin bir neçə dəqiqə sonra Nurtəkin ona zəng edərək oğlunun onunla görüşmək istəmədiyini bildirib. Mehman da bundan əsəbiləşib və oğlu ilə qayınanasının evində görüşəcəyini bildirib.

Mehman sözügedən ünvana gələn zaman baldızı ilə Əfsanənin yolla getdiyini görüb. O, maşını onların qarşısında saxlayaraq Əfsanəyə yaxınlaşmaq, ondan hansı səbəbdən evdən getdiyini soruşmaq istəyib. Əfsanə isə Mehmanı görən kimi qaçmağa başlayıb. Bundan sonra əri "Land Rover" markalı avtomobilinə əyləşərək maşını Əfsanənin arxasınca sürüb və onu vurub. Mehman daha sonra maşında olan bıçağı götürüb və yerdə huşsuz vəziyyətdə olan arvadına üç bıçaq zərbəsi endirərək onu qətlə yetirib. Davamında isə Mehman yoldan keçən tanımadığı avtomobilə əyləşib və onu polisə aparmasını xahiş edib.

Telegramda izləyin