Son günlər yayılmış qrip koronavirusla bağlıdır? - AÇIQLAMA

Son günlərdə ölkədə yoluxucu qrip mənşəli xəstəlik yayılıb. Daha çox azyaşlılarda təsadüf olunsa da, virus sürətlə yayılır və böyüklərə də keçir. Böyüklər və uşaqlar arasında yayılan qrip artıq müəyyən kütlə arasında yayılıb. Xəstəlik yüksək hərarət, burun axması, boğaz, baş, qulaq, əzələ-sümük ağrıları və şiddətli öskürək kimi simptomlarla müşahidə olunur.

Daha əvvəl isə Səhiyyə Nazirliyi azyaşlı uşaqların qrip əleyhinə peyvənd olunması ilə bağlı tövsiyə verib. Komleks tədbirlər planı çərçivəsində bütün şəhər və rayonlarda müəyyən olunmuş əhali qrupları arasında qrip əleyhinə vaksinasiya tədbirləri 2022-ci ilin oktyabr ayının 10-dan başlayaraq bir ay ərzində həyata keçiriləcək.

Azərbaycan həkimləri İctimai Birliyinin sədr müavini, həkim Aydın Əliyev Sonxeber.az-a bildirib ki, son zamanlar yayılan xəstəlik mövsümi xarakter daşıyır:

"Bu xəstəlik mövsümi kəskin respirator xəstəliklər qrupundandır. Əksər hallarda virus mənşəli olur. Amma bunun koronavirusla əlaqəsi yoxdur. Səhiyyə Nazirliyinin qripə qarşı peyvəndlənmə ilə bağlı yaydığı açıqlama tövsiyə xarakteri daşıyır. Yəni uşaqların mövsümi kəskin respirator xəstəliklərlə bağlı, əsasən virus törədicisi xəstəliklərə qarşı peyvəndlər var və könüllü sürətdə həyata keçirilir. Səhiyyə Nazirliyi bunu məcburi qaydada etmir. Sadəcə peyvəndlənmə ilə bağlı maarifləndirmə işi aparmaq olar. Yəni peyvənd olunmuş uşaqlar bu xəstəlikləri daha yüngül keçirirlər. Yaxud çox yüngül keçirdiyinə görə onların xəstəliyə yoluxduğu bilinmir.

Təbii ki, bu məsələdə immunitetin inkişafı üçün peyvəndlərin qoruyucu təsiri var. Amma bunun bir epidemik hal olduğunu düşünmürəm. Müəyyən qədər yayılma olsa da, tam kütləvi xarakter daşımır. Hər il olduğu kimi, payız vaxtı mövsümi olaraq kəskin respirator xəstəliklərin sayı artır. Hələ ki, bununla bağlı təhlükəli durum müşahidə etmirəm".

Qeyd edək ki, səhiyyə naziri Teymur Musayev Ümumdünya Səhiyyə Təşkilatının "Qriplə mübarizəyə dair Qlobal Strategiya 2019-2030" sənədinə uyğun olaraq, "2022-2023-cü ilin payız-qış mövsümünün başlaması ilə əlaqədar əhali arasında qrip və kəskin respirator virus infeksiyalarına qarşı profilaktik və əksepidemik tədbirlərin, həmçinin infeksiya üzərində epidemioloji gücləndirilməsi məqsədilə" əmr imzalayıb.

Nuranə

Telegramda izləyin