Taliban qadınların parka girişini qadağan edib

Ötən il ABŞ və NATO qüvvələrinin çıxarılması ilə Əfqanıstanda hakimiyyəti ələ keçirən Taliban paytaxt Kabildə qadınların parklara girməsini qadağan edib.
Talibanın Əxlaqsızlığın Qarşısının Alınması və Fəzilətin Təşviqi Nazirliyi qadınların ictimai parklara girişinin məhdudlaşdırılacağını açıqlayıb.

Sonxeber.az Reuters-ə istinadən xəbər verir ki, Kabildə parka daxil olmaq istəyən qadınlar Taliban üzvləri tərəfindən geri qaytarılıb.
"Ana uşaqları ilə gələndə onlara parka girməyə icazə verilməlidir. Amma bizi parka buraxmadılar və indi evə gedirik" ,- deyə Məsumə adlı yerli sakin deyib.

Qeyd edək ki, Əfqanıstanda nəzarəti ələ keçirən və qadınların hüquqlarını əlindən alan Taliban qadınların kişisiz səyahətini qadağan edib və evdən kənarda burka(gözləri də bağlayan çadra) geyinməyi zəruri edib. Ölkənin çox hissəsində qızların orta və ali məktəb səviyyəsində dövlət məktəblərində təhsil almasına icazə verilmir.

Şəbnəm Lətifi

Telegramda izləyin