Polisə bıçaqla hücum olub

Belçikanın paytaxtı Brüsseldə patrul xidməti aparan polisə bıçaqlı hücum nəticəsində bir polis məmuru ölüb.
Hadisə yerli vaxtla saat 19:15 radələrində türk əsilli insanların da sıx məskunlaşdığı Schaarbeek rayonunda baş verib.

Brüsselin Şimal qatar stansiyası yaxınlığında baş verən hücumda bir polis əməkdaşı da yaralanıb.

Sonxeber.az Belçika mətbuatına istinadən xəbər verir ki, müdaxilə edən polis tərəfindən qarın və ayağından vurulan təcavüzkar da ölüb.

Federal prokurorluq hadisə ilə bağlı terror şübhəsi ilə araşdırmalara başlayıb.

Prokurorluğun sözçüsü AFP xəbər agentliyinə bildirib ki, "terrorçuluq şübhəsi ilə" federal araşdırma başlayıb.

Belçika mediası birdən çox şahidə əsaslanaraq, hücumçunun hadisə zamanı "Allahu Əkbər" qışqırdığını yazır.
Lakin bu məlumat polis tərəfindən təsdiqlənməyib.

İddiaya görə, təcavüzkar həmçinin cümə axşamı səhər tezdən Everedəki polis bölməsinə gedib və polisləri öldürəcəyini qışqırıb.

Hədə-qorxu ilə polis idarəsində bir müddət dindirilən şəxsin daha sonra sərbəst buraxıldığı iddia edilir.

Şəbnəm Lətifi

Telegramda izləyin