İndoneziya sahilində 110 müsəlman qaçqın tapıldı

Myanmardan qaçan və bir aydan çox qayıqla getdiyi üzə çıxan 110 rohincalı qaçqın İndoneziyanın Aceh bölgəsindəki çimərlikdə tapılıb.
Sonxeber.az xarici mətbuata istinadən xəbər verir ki, Aceh əyalətinin Muara Batu bölgəsinin polis rəisi Herman Saputranın açıqlamasına görə, ərazidəki balıqçılar çimərlikdə 110 Rohinca vətəndaşını görüb və vəziyyəti polisə bildiriblər.

Çimərlikdə olan qaçqınlardan 65-nin kişi, 27-nin qadın, 18-nin uşaq olduğu bildirilib.

Səlahiyyətlilər qaçqınların sağlamlıqlarının yoxlanılacağını açıqlayıb.

Çimərlikdə olan qaçqınlardan Məhəmməd Emin Malayziyaya getdiklərini və İndoneziya sularında qapalı qaldıqlarını bildirib.

Martın 6-da Aceh bölgəsində 114 Rohinca qaçqını tapılıb.

2012-ci ildə Myanmanın Arakan əyalətində buddistlərlə müsəlmanlar arasında qarşıdurma baş vermiş, əksəriyyəti müsəlman olmaqla minlərlə insan həlak olmuş, yüzlərlə ev və iş yeri yandırılmışdı.

2017-ci il avqustun 25-də Arakandakı sərhəd postlarına eyni vaxtda edilən hücumları əsas gətirərək Myanma ordusu və Buddist millətçilərin törətdiyi kütləvi zorakılıqdan qaçan 1 milyona yaxın insan qonşu Banqladeşə sığınıb.

Çoxlu sayda rohincalar Banqladeşin Koks Bazar bölgəsindəki dolu qaçqın düşərgələrindən digər müsəlman ölkələrinə qaçmaq üçün müvəqqəti qayıqlarda həyatlarını riskə atırlar.

Şəbnəm Lətifi

Telegramda izləyin