"Bu cür gülünc qətnamələr və sərsəm açıqlamalar bizi haqq savaşımızdan döndərə bilməyəcək" - Deputat

Fransa Senatı noyabrın 15-də "Azərbaycana qarşı sanksiyaların tətbiqi və onun Ermənistan ərazisindən dərhal geri çəkilməsi, 9 noyabr 2020-ci il tarixli atəşkəs razılaşmasına riayət etməsi tələbi və iki ölkə arasında dayanıqlı sülhün bərqərar olmasına yönəlmiş bütün təşəbbüslərin təşviq edilməsi" adlı qətnamə qəbul edib.

Bununla bağlı Sonxeber.az-a danışan deputat İqbal Məmmədov bildirib ki, Fransa Senatının qəbul etdiyi sənəd işğalçını və terrorçunu dəstkləməyə xidmət edir:

"30 il ərzində işğala göz yuman və soydaşlarımıza qarşı törədilən soyqırımlara, vəhşiliklərə qarşı səssiz qalan Fransanın bu gün ermənilər üçün bu qədər əldən-ayaqdan düşməsi çox gülünc görünür. Bu, artıq 44 günlük Vətən müharibəsi zamanı və ondan sonrakı dövrdə Fransanın Azərbaycana qarşı qəbul etdiyi 3-cü qətnamədir. Fransanın qəbul etdiyi bu qətnamələrin hər biri əsassız və gülüncdür. Fransanın bu iki il ərzində atdığı addımlar və qəbul etdityi qətnamələr regionda gərginliyin artmasına xidmət edir. Bu müddətdə Fransanın əsl siması ortaya çıxıb və onun Minsk qrupunun həmsədri kimi keçmiş münaqişənin həllində də heç vaxt maraqlı olmadığı sübuta yetirilib".

Deputat qeyd edib ki, Fransa prezidentinin, Senatının, siyasətçilərinin, eyni zamanda parlament üzvlərinin də mövqeyi bizə aydındır:

"Fransa regionda vəziyyəti gərginləşdirən addımlarına davam edərsə, Azərbaycan bu ölkə ilə münasibətlərinə yenidən baxmalı olacaq. Prezident Emmanuel Makron başda olmaqla, Fransa hər zaman Azərbaycana qarşı ermənipərəst mövqe tutub. Düşünürəm ki, Azərbaycana qarşı aparılan nifrət kampaniyası davamlı olacaq. Ermənistan və havadarları anlamalıdırlar ki, bu cür gülünc qətnamələr və sərsəm açıqlamalar bizi haqq savaşımızdan döndərə bilməyəcək. Biz öz doğma torpaqlarımıza geri qayıdırıq. Bu gün heç bir statusdan söhbət gedə bilməz. Azərbaycan Qarabağ problemini iki il əvvəl öz hərbi gücünə həll edib. Bizə hər hansı ölkənin məsləhəti lazım deyil. Bizim nəyi, necə, nə vaxt edəcəyini yaxşı bilən Ali Baş Komandanımız, ölkə başçımız var. 44 günlük Vətən müharibəsində düşmənin başını əzən "Dəmir yumruq" yerindədir. Danışıqlar masasında yalnız Azərbaycanın diktəsi və şərtləridir. Əvvəl-axır Ermənistan bizim diktəmizlə hazırlanan sülh müqaviləsini imzalayacaq. Çünki sülh müqaviləsindən imtina Ermənistanın bir ölkə kimi xəritədən silinməsinə gətirib çıxaracaq".

Aysel Yusifqızı

Telegramda izləyin