Azərbaycan TDT-nin inkişafında fəal rol oynayan ölkələrdən biridir - AÇIQLAMA

"Azərbaycan Respublikasının Prezidenti İlham Əliyev sentyabrın 17-də Türk Dövlətləri Təşkilatının (TDT) Baş katibi və üzv ölkələrin təhlükəsizlik strukturlarının nümayəndələrini qəbul edib. Görüş zamanı TDT-nin inkişafı, təhlükəsizlik, nəqliyyat, enerji və iqtisadi əməkdaşlığın genişləndirilməsi ilə bağlı mühüm məqamlara toxunulub".
Bunu Sonxeber.az-a açıqlamasında politoloq Turan Rzayev bildirib.

O, bildirib ki, Azərbaycan TDT-nin inkişafında fəal rol oynayan ölkələrdən biridir:

"Prezident İlham Əliyev çıxışında təşkilatın 2009-cu ildə Naxçıvanda yaradılmasından sonra mühüm məsələlərin həlli, üzv ölkələr arasında əlaqələrin inkişafı və TDT-nin beynəlxalq mövqeyinin möhkəmləndirilməsi istiqamətində böyük potensial ortaya qoyduğunu bildirib. Dövlət başçısı vurğulayıb ki, üzv ölkələrin ümumi mövqeyi beynəlxalq arenada TDT-nin rolunu və yerini daha da gücləndirməkdir. Burada əsas məqam TDT-nin yalnız tarixi və mədəni yaxınlıq platforması kimi deyil, eyni zamanda təhlükəsizlik, enerji, nəqliyyat, iqtisadiyyat və beynəlxalq münasibətlər sahələrində koordinasiyalı fəaliyyət göstərən siyasi və iqtisadi əməkdaşlıq məkanı kimi formalaşdırılmasıdır. Son günlər türk dövlətlərinin dini liderlərinin və təhlükəsizlik şuralarının nümayəndələrinin Bakıda görüşməsi də bu əməkdaşlığın müxtəlif istiqamətlərdə genişləndirildiyini göstərir".

Politoloq bildirib ki, prezidentin çıxışından TDT qarşısında daha geniş hədəflərin dayandığı görünür:

"Təşkilat üzv dövlətlərin ortaq maraqlarını beynəlxalq siyasətdə ifadə edən, iqtisadi və nəqliyyat imkanlarını birləşdirən, təhlükəsizlik məsələlərində koordinasiyanı gücləndirən platformaya çevrilməlidir. Azərbaycanın bu prosesdəki mövqeyini gücləndirən əsas amillərdən biri onun coğrafi yerləşməsidir. Ölkənin Avropa ilə Asiyanın kəsişməsində yerləşməsi, Mərkəzi Asiya dövlətləri və Türkiyə ilə fəal əlaqələri nəqliyyat və enerji layihələrinin inkişafı üçün mühüm imkanlar yaradır. Prezident İlham Əliyevin də qeyd etdiyi kimi, bu coğrafi mövqe bütün TDT ölkələrinin maraqlarına xidmət edən nəqliyyat və enerji təhlükəsizliyi layihələrinin həyata keçirilməsində Azərbaycanın rolunu artırır. Bu baxımdan Azərbaycanın TDT çərçivəsində təşəbbüsləri yalnız milli iqtisadi maraqlarla məhdudlaşmır. Mərkəzi Asiya ilə Türkiyə arasında əlaqələrin genişlənməsi, Xəzər üzərindən nəqliyyat və enerji bağlantılarının inkişafı və Avropa bazarlarına çıxış imkanları Azərbaycanın regional tranzit və siyasi qovşaq kimi əhəmiyyətini artırır. TDT-nin güclənməsi ilə Azərbaycanın regional çəkisinin artması da paralel proseslərə çevrilir".

Onun sözlərinə görə, təşkilat daxilində əməkdaşlığın yalnız zirvə görüşləri ilə məhdudlaşmaması, dəyişən regional vəziyyətə uyğun olaraq daha çevik siyasi məsləhətləşmələrin aparılması da əhəmiyyətlidir:

"Azərbaycanın Şuşada qeyri-rəsmi sammit təşəbbüsü bu baxımdan TDT daxilində siyasi dialoqun inkişafına yönəlmiş addımlardan biri kimi qiymətləndirilə bilər. Prezidentin çıxışında Azərbaycanın Türkiyə, Qazaxıstan, Qırğızıstan və Özbəkistanla müttəfiqlik haqqında sənədlər imzalaması, eləcə də qarşılıqlı səfərlərin və ikitərəfli əlaqələrin fəallığı xüsusi vurğulanıb. Bu isə göstərir ki, Azərbaycanın TDT-dəki əməkdaşlıq siyasəti həm çoxtərəfli, həm də ikitərəfli münasibətlərin paralel inkişafına əsaslanır. İkitərəfli əlaqələrin möhkəmlənməsi də TDT çərçivəsində daha geniş və dayanıqlı əməkdaşlıq üçün əsas yaradır".

Röyalə Xəyal

Telegramda izləyin