"Fransa bizə deyil, gedib öz maşasına məsləhətini versin" - Deputat

"Fransa Senatı 15 noyabr 2022-ci il tarixli qətnaməni qəbul etməklə Azərbaycana qarşı qərəzli mövqeyini bir daha sübut etdi".

Bunu Sonxeber.az-a danışan deputat Cavanşir Paşazadə söyləyib.

Deputat qeyd edib ki, bugünkü Fransa hökuməti işağlçını dəstəkləyən addımları ilə illərdir Azərbaycanla olan dostluq münasibətlərini zədələməkdədir:

"Görünür, dünənki qətnaməni qəbul edənlər tarixdən xəbərsizdirlər. Azərbaycan Ermənistan kimi hər hansı dövlətin torpaqlarını zorla və insanlarını vəhşicəsinə qətlə yetirərək işğal etməyib. Biz öz torpaqlarımızı vuruşaraq işğaldan azad etmişik. Fransa bizə deyil, gedib öz maşasına məsləhətini versin. Fransa Senatının son iki il ərzində qəbul etdiyi qətnamələr beynəlxalq hüquqa təcavüzdür və regionda vəziyyəti gərginlişdirməyə xidmət edir. Bu qətnamə həmişə olduğu kimi Fransadakı güclü erməni lobbisinin təsiri altında qəbul edilib. Son iki ildə sayca üçüncü olan dünənki qətnamənin ümumiyyətlə heç bir qüvvəsi yoxdur".

Deputat vurğulayıb ki, Fransa və Ermənistanın digər havadarları anlamalıdırlar ki, bu gün heç bir statusdan söhbət gedə bilməz:

"İki il əvvəl Azərbaycan Dağlıq Qarabağ problemini öz hərbi gücünə həll edib. Soydaşlarımızın Qarabağa qayıdışı artıq başlayıb. Ermənistanın havadararının qəbul etdiyi sərsəm qətnamələr bizi yolumuzdan döndərə bilməyəcək. Zəngəzur dəhlizi tezliklə açılacaq və Ermənistan Azərbaycanın şərtləri ilə hazırlanan sülh müqaviləsini imzayacaq".

Aysel Yusifqızı

Telegramda izləyin