Rusiyanın Polşaya raket atması hansı mesajı verir? - Ekspertdən AÇIQLAMA

"Rusiya raketlərinin Polşa ərazisinə düşməsini biz, təbii ki, Rusiya-Ukrayna müharibəsi fonunda Ukraynaya dəstək verən ölkələrin bu müharibədəki maraqları fonunda qiymətləndirməliyik. Təbii ki, indi Rusiya tərəfi əgər bunları bilərəkdən etmədiyini demək istəsə belə, bunu Ukrayna üzərinə yönəltməlidirlər".

Bu sözləri BiG.AZ-a açıqlamasında hərbi ekspert Elxan Şıxəliyev deyib.

Ekspertin sözlərinə görə, Polşaya Rusiya raketinin düşməsinin səbəbi Rusiyanın Polşaya da mesaj vermək istəməsi olub:

"Düşünürəm ki, Rusiya bunu etməklə də NATO-nun reaksiyasını test edir. Biz bilirik ki, Şimali Atlantika alyansına daxil olan ölkələrin Ukraynaya hərbi maliyyə, hərbi-texniki dəstəyi həyata keçirilir və əsas hərbi təminat yolları Polşadan keçir. Əslində bu raketlərin Polşa ərazisinə yönlənməsinin səbəbi Rusiyanın Polşaya da mesaj vermək istəməsi olub. Yəni demək istəyir ki, "əgər siz bu dəstəyi davam etdirəcəksinizsə, sizə də qarşı bu raketləri tətbiq edə bilərik".

İkinci bir variantda isə, Şimali Atlantika alyansına daxil olan ölkələr həmin alyansa daxcxil olan Polşanı müdafiə etsə, Rusiya bunu, təbii ki, Ukrayna üzərinə atacaq, yaxud "yanlışlıqla olub" deyəcək.

Biz Rusiyanın atacaqları raketlərin dəqiq olmadığını, hədəfdən çox uzaq məsafələrə, fərqli hədəflərə gedəcəyini bilirik. Yəni Rusiya raket tətbiqi zamanı bəzən bir hədəfə atdığı halda başqa bir hədəfə düşüb. Ona görə də Şimali Atlantika alyansının müqaviləsində belə bir anlaşma var ki, hər hansı bir ölkənin ərazisinə təhdid və təhlükə yaranarsa, kollektiv cavab verilməlidir.

Rusiya əslində özü də bəyan edir ki, artıq NATO ilə əməliyyatlar fonunda döyüşür. Bu, o deməkdir ki, NATO-ya daxil olan ölkənin ərazisinə Rusiyanın raketinin düşməsi NATO-nun da marağında olacaq. Bunun qarşılığında Ukraynaya verəcəkləri silahların həcmini artıracaqlar.

Ona görə də düşünürəm ki, Rusiyanın bu zərbələri əslində birbaşa Ukrayna qüvvələrinə ciddi müqavimət göstərə bilməməsi səbəbindəndir. Yəni Rusiya istəyir ki, Şimali Atlantika alyansına daxil olan ölkələrin siyasi rəhbərlikləri müharibəni dayandırmaq üçün Ukraynanı məcbur etsinlər. Ukraynanın özündə, Kiyevdə və digər şəhərlərdə elektrik enerjisinin, mülki infrastrukturun bombalanmasının səbəbi budur. Polşaya da raketlərin atılması xüsusən Lvov üzərindəndir, çünki ora Avropadan gələn yolun üzərindən əsas texniki təminat mərkəzidir.

Bununla da Rusiya Ukraynanı elə vəziyyətə gərirməyə çalışır ki, Rusiya Dnepr çayı sahillərində mövqelənsin, müharibəni dayandırsın və artıq diplomatik masada dialoqlara çevrilsin.

Düşünürəm ki, Rusiyanın niyyəti bu olsa belə, qarşısındakı güc Rusiyanın çökməsi, ərazilərinin siyasi, iqtisadi qlobal güc statusundan düşməsi üçün müharibənin davamını itəyəcək. Bu ölkələr bütün maddi və hərbi imkanlarını ortaya qoyacaqlar ki, başlamışkən birdəfəlik Rusiyanın siyasi, hərbi gücünü əlindən alsınlar".

Xatırladaq ki, dünən Rusiyanın Ukraynaya atdığı raketlərdən biri Polşa ərazisinə düşüb. Mərmilər Ukrayna ilə sərhəddə yerləşən Pşevodov kəndindəki fermaya tuş gəlib. Raket zərbələri nəticəsində yerli sakinlərdən iki nəfərin öldüyü bildirilib.

Telegramda izləyin