Çində "iPhone" fabrikində etiraz aksiyası- VİDEO

Foxconn şirkətinin Çinin Zhengzhou şəhərindəki iPhone fabrikində işləyən işçilər Covid-19 tədbirlərinə etiraz edərək polislə dalaşıblar.

Sonxeber.az xəbər verir ki, dünyanın ən böyük iPhone fabriki kimi tanınan Foxconn-un Çinin Zhengzhou şəhərindəki fabrikində etirazlar başlayıb. Dünən gecədən başlayan və səhərə qədər davam edən aksiyada işçilər sərt Covid-19 tədbirlərinə, o cümlədən vəd edilən ödənişlərin həyata keçirilməməsinə və kifayət qədər qida çatışmazlığına etiraz ediblər.

Covid-19 tədbirləri çərçivəsində 1 aya yaxındır qapalı rejimdə işləyən, giriş-çıxışlarına ciddi nəzarət edilən işçilərin qəzəbi kameralara əks olunub. Sosial mediada paylaşılan görüntülərdə işçilərin qoruyucu kombinezon geyinmiş polislə toqquşduğu və epidemiya ilə mübarizə üçün qoyulan maneələri sökdüyü görülüb.
"Evə qayıtmaq istəyirik" şüarları səsləndirən işçilərin bəzilərinin yaralandığı, bəzi işçilərin səhhətinin ağır olduğu iddia edilib. Görüntülərdə yerə yıxılan işçinin qoruyucu kombinezon geyindiyi halda polislər tərəfindən təpikləndiyi görünür.

200 mindən çox işçinin çalışdığı fabrikdə Oktyabr ayında Covid-19 hadisələrinin görüldüyü səbəbiylə giriş-çıxışlara qadağa qoyulmuş, çamadan və bel çantaları ilə fabrikdən qaçan işçilərin görüntüləri gündəmə gəlmişdi. Karantin çərçivəsində Foxconn-un minlərlə işçini saatlıq maaş və bonusların artırılması vədi ilə zavodda qalmağa razı salması mətbuatda əksini tapıb.

Foxconn-da Covid-19 hallarının artması ilə əlaqədar "məhdud tutumla işləmə"nin tətbiqindən sonra istehsalda azalma olduğu və buna görə də iPhone 14 və digər məhsulları almaq istəyənlərin gözləməli olacağı açıqlanıb.

Şəbnəm Lətifi

Telegramda izləyin