"Qardaş Türkiyə ordumuzun peşəkarlığının artırılmasında öz dəstəyini əsirgəmir" - DEPUTAT

"Azərbaycan dost və tərəfdaş ölkə olan Türkiyə ilə davamlı olaraq birgə hərbi təlimlər keçirir. Buna Azərbaycan və Türkiyənin "Mustafa Kamal Atatürk-2021", "Anadolu Qartalı-2021", "Sarsılmaz Qardaşlıq-2021", "TurAz Qartalı - 2022" hərbi təlimləri buna sübutdur. Dövlətimizin ən çox birgə hərbi təlim keçirdiyi ölkə də məhz Türkiyədir".

Bunu Sonxeber.az-a danışan deputat Müşfiq Cəfərov bildirib.

Deputat qeyd edib ki, Azərbaycan-Türkiyə birgə hərbi təlimləri regionun müasir texniki təminatlı silahlı qüvvələrinin gücünü və səviyyəsini nümayiş etdirir: "Mən deyərdim ki, birgə keçirilən bu hərbi təlimlər mühüm təşəbbüsdür və regional təhlükəsizliyin təmin olunması üçün də əhəmiyyət daşıyır.

Digər tərəfdən də Azərbaycan ilə Türkiyə bununla əsl müttəfiqlik nümunəsini ortaya qoyurlar. Strateji tərəfdaşlıq haqqında imzalanan bəyənnamənin ən mühüm istiqamətlərindən biri olan hərbi əməkdaşlıq məsələsi iki qardaş ölkənin Silahlı Qüvvələrinin bütün situasiyalarda birgə fəaliyyəti üçün yeni perspektivlər vəd edir. Mən deyərdim ki, starteji tərəfdaşlıq yeni dönəmdə Azərbaycan-Türkiyə müttəfiqliyinin əsas komponentləri sırasındadırⅦ.

Deputat vurğulayıb ki, Türkiyə Azərbaycan Silahlı Qüvvələrinin modernləşməsində, ordumuzun peşəkarlığının artırılmasında öz dəstəyini əsirgəmir:

"Artıq Azərbaycan Ordusu NATO standartlarına uyğun bir orduya çevrilib. Bunun ən bariz sübutu isə İkinci Qarabağ müharibəsi oldu. Azərbaycan Ordusunun 44 günlük müharibədə göstərdiyi peşəkarlıq hələ də müzakirə mövzusudur".

Aysel Yusifqızı

Telegramda izləyin