Cənubi Sudanda qəbilə münaqişələri 40 min mülki insanı didərgin salıb

Cənubi Sudanın Yuxarı Nil əyalətində tayfalararası qarşıdurmalar baş verib və 40 min insanı didərgin düşüb.

Sonxeber.az xəbər verir ki, BMT-nin Cənubi Sudandakı müvəqqəti humanitar koordinatoru Peter Van der Auweraert, məcburi köçkünlərə məhdud imkanlarla kömək etməyə çalışdıqlarını və qida, su və gigiyena materiallarına əlavə olaraq psixososial dəstəyə ehtiyac olduğunu bildirib.

BMT-nin Uşaq Fondu (UNICEF) zorakılıqdan qaçanların 75 faizinin qadın və uşaqlar olduğunu və minlərlə insanın Sudana keçdiyini bildirib.

2011-ci ildə Sudandan müstəqilliyini elan edən Cənubi Sudan, prezident Salva Kiir Mayarditin 16 dekabr 2013-cü ildə müavini Riek Macarı "çevriliş cəhdi" iddiası ilə vəzifəsindən azad etməsindən sonra vətəndaş müharibəsinə sürükləndi.

Tərəflər uzun illər davam edən müharibədən sonra 2018-ci ildə sülh imzalasa da, ictimai asayişin və təhlükəsizliyin təmin oluna bilmədiyi ölkədə müxtəlif tayfa və qruplar arasında zorakılıq davam edir.

Şəbnəm Lətifi

Telegramda izləyin