Vasif Talıbov deputat mandatından məhrum edilə bilərmi?

Xəbər verdiyimiz kimi, Naxçıvan Muxtar Respublikası Ali Məclisinin sədri Vasif Talıbov istefa verib. 1995-ci ilin dekabr ayından Naxçıvan Muxtar Respublikası Ali Məclisinin sədri vəzifəsini icra edən Vasif Talıbov hazırda Milli Məclisin deputatı, Yeni Azərbaycan Partiyası İdarə heyətinin üzvüdür. V.Talıbovun deputatlıq mandatının taleyinin necə olacağı barədə suallar yaranıb. Qeyd edək ki, Vasif Talıbov Ali Məclisin deputatı kimi fəaliyyətinə xitam verilməsi ilə bağlı müraciət etməyib.

Bəs deputat mandatı hansı hallarda ləğv edilir?

İctimai-siyasi xadim, hüquq müdafiəçisi Sahib Məmmədov BiG.AZ-a açıqlamasında bu barədə fikirlərini bölüşüb:

"Azərbaycan Respublikası Milli Məclisinin deputatının mandatdan məhrum edilməsi, əlindən alınması, yaxud Azərbaycan Respublikası Milli Məclisinin deputatlarının səlahiyyətlərini itirməsi Konstitusiyanın 89-cu maddəsi ilə müəyyən olunur. Orada göstərilən hallar baş verdikdə Azərbaycan Respublikası Milli Məclisinin deputat mandatından məhrum etmə, yaxud da deputat səlahiyyətlərinin itirilməsi baş verə bilər.

Azərbaycan Respublikasının Konstitusiyasında göstərilib ki, deputat mandatının ləğvi seçkilər zamanı səslərin düzgün hesablanmadığı sonradan aşkar olunduqda, deputat Azərbaycan Respublikası vətəndaşlığından çıxdıqda, yaxud başqa dövlətin vətəndaşlığını qəbul etdikdə, cinayət törətdikdə və məhkəmənin qanuni qüvvəyə minmiş hökmü olduqda, dövlət orqanlarında vəzifə tutduqda, dini xadim olduqda, elmi, pedaqoji faəliyyət istisna olmaqla, sahibkarlıq, kommersiya və başqa ödənişli fəaliyyətlərlə məşğul olduqda, özü deputat mandatından imtina etdikdə baş verir.

Bir də Konstitusiyanın 93-cü maddəsində göstərilib ki, deputat səsvermə hüququndan bilavasitə özü istifadə etməlidir. Əks halda deputat mandatını itirə bilər. Deputat üçün qanunla müəyyən edilmiş etik davranış qaydaları kobud sürətdə pozulduqda da mandatdan məhrum edilmə baş verir. Pozulma halı olduqda işə Milli Məclisin İntizam Kommissiyası baxır və bundan sonra təqdimat verilir. Bu proses Azərbaycan Respublikasının Milli Məclisinin deputat mandatından məhrum etmə haqqında qərarla müəyyən olunub. Həmçinin, Milli Məclisin deputatı öz səlahiyyətlərini bu və ya digər səbəbdən icra edə bilmədikdə, qanunda nəzərdə tutulmuş digər hallarda səlahiyyətlərini itirir. Tutaq ki, uzun müddət Milli Məclisin iclaslarında iştirak edə bilmir və s. Bu, mandatdan məhrumetmə halına, yaxud onun səlahiyyətlərininə xitam verilməsinə gətirib çıxarır".

Hüquqşünas bildirib ki, deputatın toxunulmazlığının götürülməsi onun deputat mandatına xitam verilməsi demək deyil.

"Bununla yanaşı, deputatın toxunulmazlığının götürülməsi məsələsi də var. Toxunulmazlıq hüququnun götürülməsi hələ onun deputat mandatını itirməsi demək deyil. Deputat toxunulmazlığının götürülməsi də Konstitusiyanın 90-cı maddəsi ilə müəyyənləşdirilir. Yəni səlahiyyət müddəti ərzində Milli Məclisin deputatının toxunulmazlığı təmin olunur. Bu, həm Konstitusiyada əks olunub, həm də "Mili Məclisin deputatlarının statusu haqqında" qanun ilə onların toxunulmazlığı göstərilir. Yəni burada hansı hallarda onların toxunulmaz olduğu bildirilir. Onların mənzil toxunulmazlığı, yazışmalarına müdaxilə etməklə bağlı məhdudiyyət var. Onlar cinayət başında bilavasitə tutulmadıqları halda cinayət məsuliyyətinə cəlb edilə bilməzlər. Cinayət məsuliyyətinə cəlb olunması üçün gərək toxunulmazlığın götürülməsi ilə bağlı Baş Prokurorluğun təqdimatı olsun. Toxunulmazlığın götürülməsi hələ onun deputat mandatına xitam verilməsi demək deyil".

Telegramda izləyin