Ərdoğan Putinlə hansı məsələləri müzakirə edəcək?

Türkiyə və Rusiya Prezidentləri Rəcəb Tayyib Ərdoğan və Vladimir Putin arasında danışıqların gündəmində olacaq əsas məsələlər məlum olub.

Ukrayna böhranının həlli, Türkiyə ərazisində qaz qovşağının yaradılması layihəsi və Suriya problemi müzakirə mövzusu olacaq.

"Aydındır ki, Ərdoğan Ukraynadakı vəziyyəti müzakirə edəcək və iki ölkə rəhbərliyi ilə təmasların saxlandığını nəzərə alsaq, Ankaranın bu istiqamətdə yeni təşəbbüslərini istisna etmək olmaz. Qovşağın yaradılması layihəsi hər iki tərəfin gündəmində duran olduqca aktual məsələdir. Türkiyə tərəfi il ərzində Avropaya təbii qaz tədarükü mərkəzinin yaradılması və qiymətlərin formalaşdırılması planlarını açıqlayıb. Prezidentlərin Türkiyədə ilk enerji bloku olan "Akkuyu" AES-in tikintisi layihəsinə də toxunacaqları gözlənilir. Bu enerji blokunun bu il istifadəyə verilməsi planlaşdırılır", - deyə Ankaradakı mənbə iki ölkə liderləri arasında mümkün danışıqlar gündəmini şərh edərkən bildirib.

Onun fikrincə, Suriya məsələsi Türkiyə və Rusiya prezidentlərinin müzakirə edə biləcəyi başqa bir məsələ olacaq.

"Dekabrın sonunda Moskvada müdafiə nazirləri səviyyəsində Suriya üzrə üçtərəfli görüş keçirildi. Hazırda xarici işlər nazirlərinin danışıqları planlaşdırılır ki, bunun da nəticəsində Türkiyə və Suriya prezidentlərinin Rusiya Federasiyasının iştirakı ilə görüşü baş tuta bilər", - deyə mənbə qeyd edib.

Telegramda izləyin