"Ermənistan bizim şərtlərimizlə hazırlanan sülh müqaviləsini imzalamağa məcburdur" - DEPUTAT

Xəbər verdiyimiz kimi Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən etiraz aksiyası altmış yeddi gündür davam edir.

Bununla bağlı Sonxeber.az-a danışan deputat İqbal Məmmədov bildirib ki, 67 gündür ki, dünya Azərbaycan xalqının iradəsini və vətənə olan bağlılığını bir daha gördü:

"Havanın soyuq və şaxtalı olmasına baxmayaraq, aksiya iştirakçıları etirazlarını yüksək əhvali-ruhiyyə ilə davam etdirirlər. Əvvəl Ermənistan tərəfi və Rusiya sülhməramlıları düşündülər ki, bir neçə gündən sonra oradakı soyuğa dözə bilməyən aksiya iştirakçıları geri çəkiləcək. Ancaq 67 gündür ki, gənclərimiz əsil vətənpərvərlik nümunəsi göstərərək dünyaya sübut etdilər ki, torpaqlarımızın bir qarışını güzəştə getmədiyimiz kimi ekoloji sərvətlərimizi düşmənə verməyəcəyik".

Deputat vurğulayıb ki, təəssüf ki, Ermənistan və onun havadarların 44 günlük Vətən müharibəsindəki biabırçı məğlubiyyətlərindən hələ də dərs çıxarmayıblar:

"Tarix boyu Azərbaycan xalqına qarşı müxtəlif qətllər, soyqırımılar törədən erməni vandalları, 30 il ərzində işğal etdikləri torpaqlarımızda müxtəlif vəhşiliklər, ekoloji terrorlar törədiblər. Təəssüf ki, bu günə kimi dünya, eləcə də Rusiya sülhməramlıları erməni vəhşiliklərini görməməzlikdən gəlir. Necə ki, 30 il ərzində torpaqlarımızın işğalına göz yumduqları kimi. 44 günlük Vətən müharibəsində Azərbaycan öz gücünə ədaləti bərpa edərək işğala son qoydu. Ali Baş Komandan İlham Əliyevin rəhbərliyi Azərbaycanın Müzəffər Ordusu düşməni döyüş meydanında məhv edərək Qarabağı öz sahibinə geri qaytardı. Bu gün danışıqlar masasında yalnız Azərbaycanın diqtəsi və şərtləridir. Ermənistan bizim şərtlərimizlə hazırlanan sülh müqaviləsini imzalamağa məcburdur. Sülh müqaviləsindən imtina Ermənistanın bir ölkə kimi yox olması deməkdir".

Aysel Yusifqızı

Telegramda izləyin