Məktəbli forması sadəcə geyim deyil: Bəs əhəmiyyəti nədir?

Məktəblərdə vahid geyim formasının tətbiqi yalnız şagirdlərin xarici görünüşü ilə bağlı deyil, həm də məktəb mühitində bərabərliyin qorunması, nizam-intizamın formalaşması və təhsil müəssisəsinə məxsusluq hissinin gücləndirilməsi baxımından əhəmiyyət daşıyır. Eyni zamanda, vahid forma şagirdlər arasında geyimə görə fərqlərin ön plana çıxmasının qarşısını almağa, onların diqqətini tədris prosesinə yönəltməyə kömək edə bilər.

Bəs vahid məktəbli forması uşaqların davranışına, məktəbə münasibətinə və təhsil mühitinə hansı təsirləri göstərir?

Mövzu ilə bağlı Nizami Gəncəvi adına Ədəbiyyat İnstitutunun elmi katibi, filologiya üzrə fəlsəfə doktoru, dosent Aygün Bağırlı Sonxeber.az-a açıqlamasında bildirdi ki, orta məktəblərdə vahid geyim prinsipinin birmənalı qorunması məhdudiyyət deyil, Azərbaycanın modern və müstəqil dövlət modelinin, güclü maarifçilik xəttinin göstəricisidir. Bu siyasət gənc nəsli kənar ideoloji təsirlərin təzyiqindən sığortalayır, onlara bitərəf və təhlükəsiz təhsil mühitində inkişaf etmək imkanı verir.

Yetkinlik yaşına çatan hər bir fərd öz həyat tərzini və dünyagörüşünü sərbəst şəkildə müəyyənləşdirmək hüququna malikdir, lakin məktəb həmişə toxunulmaz bir elm məbədi kimi qalmalı, elmin və milli-mənəvi tərəqqinin işığı hakim olmalıdır.

Müəllif: İlkin Məmmədkərimov

Telegramda izləyin