Slovakiya parlamenti Rusiyanı terrorçu rejim kimi tanıyıb

Slovakiya parlamenti Rusiyanın Ukraynadakı hücumlarına qarşı yeni təklif qəbul edib və Moskva administrasiyasını "terrorçu rejim" kimi xarakterizə edib.

Sonxeber.az xəbər verir ki, yanvarda parlamentə təqdim edilən anti-Rusiya təklifi dünən axşam saatlarında keçirilən iclasda 120 deputatdan 78-nin dəstəyi ilə qəbul edilib.

Sözügedən qətnamədə Ukrayna xalqının öz müqəddəratını təyin etmə hüququna hörmət edilməli olduğu, Ukraynanın infrastrukturu və mülki şəxslərə qarşı hücumların artması səbəbindən Rusiyanın terrorçu rejim kimi qələmə verildiyi bildirilib.

"Asambleya Ukraynaya qarşı təcavüz cinayətinin təqibi üçün xüsusi tribunalın yaradılması, insanlığa qarşı cinayətlər və müharibə cinayətləri törədənlərin təhqiqatı, təqibi və cəzalandırılması üçün hərtərəfli, beynəlxalq səylərə dəstəyini ifadə edir", - deyə qətnamədə bildirilir.

Qətnamədə o da qeyd olunub ki, Ukraynanın Donetsk, Luqansk, Xerson və Zaporojya vilayətlərində keçirilən referendumların nəticələri tanınmayacaq.

Şəbnəm Lətifi

Telegramda izləyin