Bədəni rahatlandıran üsul - AROMATERAPİYA haqqında bilmədikləriniz - VİDEO

Aromaterapiya son zamanlar ölkəmizdə də geniş yayılan müalicə üsuludur. Efir yağlarından istifadə olunaraq edilən bu müalicənin üstünlükləri olduğu qədər, əks təsirləri də var.

Sonxeber.az xəbər verir ki, həkim-fitoterapevt, apiterapevt, bitkilər üzrə elmi işçi Elnur Eldaroğlu bu barədə danışıb.

O, qeyd edib ki, bəzi şəxslərə bu üsulla müalicə ümumiyyətlə tövsiyə edilmir:

"Depressiya, həyəcan, vaxtaşırı baş ağrıları, özünə qapanma, əhval-ruhiyyənin itməsi zamanı belə, efir yağları ilə aromaterapiyadan istifadə olunur. Lakin hamiləlik dövründə toksikoz olduğu halda, həmçinin 2 yaşınadək uşaqlarda və xüsusi ilə allergiyası yüksək olan, dəri həssaslığı, ekzeması olan insanlarda yerli istifadə məhdudlaşdırılmalı, yaxud ümumiyyətlə istifadə olunmamalıdır".

Həkim əlavə edib ki, aromaterapiya yuxu pozğunluğu zamanı da effektivdir. Yuxu rejimini normallaşdırmaq, yuxunu dərinləşdirmək, beyni rahatlaşdırmaq, baş ağrılarını aradan qaldırmaq üçün gün ərzində, bir dəfə də olsa, hər ələ 3-4 damçı lavanda yağı töküb, gicgah və alın nahiyəsinə 3-4 dəqiqə yavaş-yavaş edilən masajla yeridilir.

Səpgilər zamanı isə dəri tam yuyub təmizləndikdən sonra üzərinə zərif qatla limon və kəklikotu yağları çəkilir.

Aromaterapiyanın tətbiq sahələrindən biri də fizioterapiyadır. Paralel müalicə zamanı müxtəlif masajların edilməsi gərginliyi aradan qaldırır.

Natəvan Baxşiyeva

Telegramda izləyin