"Azərbaycan artıq müxtəlif hüquq müstəvilərində prosesə start verib" - DEPUTAT

"Ötən ilin noyabrın 25-də ADA Universitetində keçirilən beynəlxalq konfransda Prezident İlham Əliyev 30 illik işğal, habelə Ermənistanın törətdiyi sülh və insanlıq əleyhinə cinayətlərlə bağlı məhkəmə perspektivindən danışmış və bəyan etmişdi ki, artıq əgər beynəlxalq hüquqi təsisatların qərarları siyasiləşdirilməsə, həmin qurumlar müəyyən erməni və avropalı havadarların hər hansı təzyiqinə məruz qalmayıb işlərə obyektiv qaydada baxarsa, onda əlbəttə ki, işi udacağımıza böyük şans var.Bildiyiniz kimi, Azərbaycan artıq müxtəlif hüquq müstəvilərində prosesə start verib və "İrqi Ayrı-Seçkiliyin Bütün Formalarının Ləğv Edilməsi haqqında" beynəlxalq konvensiyanın tətbiqi ilə bağlı məhkəmə işləri üzrə Beynəlxalq Ədalət Məhkəməsi də bu hüquqi platformalardan biridir. Məhkəmənin ötən gün qeydə alınan qərarı isə göstərir ki, proseslərin ümumi gedişi bizi qane edir. Bildiyiniz kimi, qərarda Məhkəmə Ermənistanın tərəflər arasında mübahisəni gərginləşdirməkdən çəkinmək barədə hələ də öhdəlik daşıdığını bir daha təsdiq edib. Nəzərinizə çatdırım ki, Məhkəmə 7 dekabr 2021-ci il tarixli qərarında da eyni öhdəliyi müəyyən etmişdi və sənəddə ikinci dəfə bu öhdəliyin təsbit olunması əslində gərginliyin məhz Ermənistandan qaynaqlanması barədə predusial mövqe formalaşdırır".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, həmçinin Məhkəmə Ermənistanın iki iddiası - Azərbaycan tərəfindən etirazların "təşkili və dəstəklənməsinin dayandırılması" və Qarabağa "təbii qaz və digər kommunal xidmətlərin verilməsini dərhal bərpa etməsi" barədə müvəqqəti tədbirlərin tətbiqini tələb edən vəsatətlərini rədd etməsi İrəvanı hüquq müstəvisində çətin duruma salır.

"Məhkəmənin bu mövqeyi eyni zamanda siyasi nəticə doğurur və Qarabağ bölgəsində yaşayan ermənilərin blokada və humanitar fəlakətlə üz-üzə qalması barədə bəyanatların əslində həqiqət olmadığını hüquqi cəhətdən əsaslandırır. Xarici İşlər Nazirliyinin yaydığı açıqlamada da ifadə olunduğu kimi, Azərbaycan tərəfi Məhkəmənin qeyd etdiyimiz hər iki məsələ üzrə mövqeyini alqışlayır. Eləcə də Məhkəmənin öz qərarında Azərbaycanın səlahiyyətləri daxilində Laçın yolu boyunca təhlükəsiz hərəkəti təmin etmək üçün sərəncamında olan bütün addımları atdığı və atacağına dair, habelə 10 noyabr Üçtərəfli Bəyanatın şərtlərini yerinə yetirdiyi barədə səylərini nəzərə alması özlüyündə pozitiv məqamlardır və işə mahiyyəti üzrə baxarkən nəzərə alınacaq vacib məsələlərdir.Bundan başqa, Məhkəmə Ermənistanın ərazilərimizi minalaması məsələsinin "müvəqqəti tədbirlər" adlı prosessual tədbirin tətbiq dairəsinə aid olmadığı qənaətinə gəlib. Yəni bu mövqe Ermənistan tərəfindən minaların yerləşdirilməsinə verilən hüquqi qiymət yox, bu prosesin müvəqqəti tədbirlərin tətbiq dairəsinə uyğun olub-olmamasına dair hakimlərin qənaətidir. Məhkəmə əvvəlki iclasda bu məsələnin müvəqqəti tədbirlərin tətbiq dairəsinə aid olmadığı qənaətinə gəlmişdi və dünənki qərarda da əvvəl gəldiyi nəticəyə yenidən baxılmağa lüzum görməyib. Maraqlıdır ki, erməni mediası və Soros qaynaqlı bəzi yerli media təsisatların Məhkəmənin bu texniki prosefura dair qənaətini xüsusi qabardaraq az qala Ermənistanın qələbəsi kimi təqdim etmək kimi məqsədli və savadsız cəhdlərini görürük. Amma bir daha qeyd edim ki, bu mahiyyət üzrə qərar yox, sadəcə texniki prosesdurdur və bizim gələcəkdə həm cari məhkəmə, həm də digər müstəvilərdə minalanma cinayətlərinə görə Ermənistanın məsuliyyətə cəlb edilməsi istiqamətində səylərimizə mane olmayacaq. Azərbaycan beynəlxalq hüquq çərçivəsində Ermənistanın dövlət səviyyəsində törədilən cinayətlərə görə məsuliyyətə cəlb edilməsi istiqamətində bütün lazımlı addımları atmaqda davam edəcək".

Telegramda izləyin