"Ulu Heydər Əliyev hər bir azərbaycanlının ürəyində xüsusi iz buraxan dahi şəxsiyyətdir" - DEPUTAT

"Dünyada tanınmış siyasi xadim kimi tanınan, vətənini və xalqını öz canından üstün tutan bu cür liderə sahib olduğumuz üçün çox şanslıyıq"
Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, bu il ulu öndərin 100 illiyi tamam olur:

"Bu il ərzində Heydər Əliyev irsi bütün dünyaya çatdırılacaq. Dünyada tanınmış siyasi xadim kimi tanınan, vətənini və xalqını öz canından üstün tutan bu cür liderə sahib olduğumuz üçün çox şanslıyıq. Ulu Heydər Əliyev hər bir azərbaycanlının ürəyində xüsusi iz buraxan dahi şəxsiyyətdir. Ötən 30 il sübut etdi ki, ulu öndər Heydər Əliyevin siyasəti nə qədər müdrik və uzaqgörəndir. Heydər Əliyev bütün həyat və fəaliyyətini Azərbaycana və onun inkişafına, tərəqqisinə həsr edən dahi şəxsiyyət idi. Müstəqilliyimizin ilk illəri dövlətimiz və xalqımız üçün ağır bir dövr idi. Dövlətimizi yenidən əsarət altına düşməkdən yalnız ulu öndər Heydər Əliyev xilas edə bilərdi. Belə oldu. Xalqımızın istək və arzusu hakimiyyətə qayıdan Ulu Öndər xalqımızı bütün bəlalardan xilas etdi. Heç kəsə sirr deyil ki, Azərbaycanda beynəlxalq normalara söykənən demokratik, hüquqi dövlətin yaranması, milli, mənəvi və əxlaqi dəyərlərimizin qorunub saxlanması, ilk Milli Konstitusiyamızın qəbul edilməsi, vətəndaş cəmiyyətinin formalaşdırılması ulu öndər Heydər Əliyevin adı ilə bağlıdır. Məhz ümummilli lider Heydər Əliyevin uğurlu siyasəti sayəsində Azərbaycan dünyada tanınan nüfuzlu bir dövlətə çevrildi".

Deputat vurğulayıb ki, Azərbaycan həqiqətlərini dünyaya çatdıran, torpaqlarımızın Ermənistan tərəfindən işğal olunması faktını beynəlxalq arenaya çıxaran şəxs məhz Ulu Öndər olmuşdur:

"Ən önəmlisi isə ulu öndər Heydər Əliyev hakimiyyətə gəldikdən sonra bütün sahələrdə olduğu kimi ordu quruculuğunda nizam-intizam və vahid ordu yaradıldı.1993-cü ilin yayında ümummilli lider Heydər Əliyevin xalqın təkidi ilə hakimiyyətə qayıdışından sonra ordu quruculuğu istiqamətində də mühüm addımlar atıldı, 1994-cü il mayın 12-də atəşkəs haqda müqavilə imzalandıqdan sonra Azərbaycanda ordu quruculuğu daha da sürətləndi. Ulu öndər Heydər Əliyevin həyata keçirdiyi siyasət nəticəsində Silahlı Qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına, döyüş ruhunun yüksəldilməsinə diqqət artırıldı.Bu gün Azərbaycan Silahlı Qüvvələrinin quruculuğu prosesi davam etdirilir və ordumuz inkişaf, təkmilləşmə dövrünü yaşayır. Hərtərəfli güclənən, hərbi qüdrəti, döyüş qabiliyyəti artan Azərbaycan Ordusu böyük inkişaf yolu keçib. Ümummilli lider Heydər Əliyevin bütün sahələrdə olduğu kimi ordu quruculuğu, eləcə də milli təhlükəsizlik siyasəti ilə bağlı başladığı işlər cənab prezident İlham Əliyev tərəfindən uğurla davam etdirilir. Ən önəmlisi isə Ali Baş Komandan ulu öndərin ən böyük arzusunu reallaşdıraraq torpaqlarımızın işğaldan azad olunmasına nail oldu. Bu gün ümumilli lider Heydər Əliyev həyatda olsaydı cənab prezident İlham Əliyevlə həm övlad kimi, həm də layiqli davamçısı kimi qürur duyardı".

Aysel Yusifqızı

Telegramda izləyin