"Bakı Zirvəsi dünya nizamının dəyişməsi, qlobal ədalətin təmin olunması üçün mühüm fürsət yaradıb"-ŞƏRH

"Bakıda Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşü bütövlükdə beynəlxalq hüquq tarixində islahat və dəyişikliklərə doğru dönüş nöqtəsi hesab oluna bilər. Qoşulmama Hərəkatının sədri, Azərbaycan Respublikasının Prezidenti cənab İlham Əliyevin dediyi kimi, "son bir neçə onillikdə mövcud olan beynəlxalq təhlükəsizlik arxitekturası hazırda köklü dəyişikliklərlə üzləşir və multilateralizm təhlükə altındadır. Bu dövrə qədər mövcud sistemin təhlükəsizliyinə zəmanət verən prinsip və mexanizmlər isə artıq işlək deyil və bu, beynəlxalq düzəni daha da təhdid edir. Cənab İlham Əliyevin təbirincə desək, "müasir beynəlxalq hüququn norma və prinsipləri aşınıb", BMT bu geosiyasi situasiyada artıq əsas vəzifələrinin, beynəlxalq sülh və təhlükəsizliyi qorumaq və möhkəmlətmək, dövlətlər arasında əməkdaşlığı inkişaf etdirmək missiyalarının öhdəsindən gələ bilmir. Təəssüf doğuran məqam isə odur ki, bu vəziyyət əslində bir çoxları, xüsusən BMT Təhlükəsizlik Şurasının daimi üzvləri üçün münbit mühit hesab edilir və faktiki olaraq təşkilat islahatlar üçün açıq görünmür. Digər təəssüf doğuran məqam isə, ehtiyac olmasına baxmayaraq bu süni əngəlləri aşaraq BMT-nin fəaliyyətini təftiş etmək, qurumda islahatlar aparmaq məsələsində köklü təşəbbüslər də faktiki yox səviyyəsindədir".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, Azərbaycan Qoşulmama Hərəkatına sədrliyə başladıqdan sonra cənab İlham Əliyev beynəlxalq münasibətlər sistemində islahat təkliflərini sistemli formada hərəkatın gündəliyinə çevirməyə başladı.

"Prezident İlham Əliyev fikrini onunla əsaslandırır ki, "BMT Təhlükəsizlik Şurası keçmişi xatırladır və indiki reallığı əks etdirmir". Cənab İlham Əliyevin təklifi də odur ki, Təhlükəsizlik Şurasının tərkibi genişləndirilməli, orada daha çox ölkə və region, habelə sivilizasiyalar təmsil edilməlidir. Həmçinin Təsisatın rəhbəri kimi cənab İlham Əliyev hesab edir ki, "Qoşulmama Hərəkatı beynəlxalq arenada daha nəzərəçarpan və səmərəli rol oynamalı, yeni dünya düzəninin yenidən formalaşmasında fəal iştirak etməlidir".
Əslində, bu istiqamətdə kafi təcrübə də formalaşıb, bildiyiniz kimi, məhz Azərbaycan Prezidentinin təşəbbüsü ilə pandemiya ilə mübarizədə qlobal səylər məhz Qoşulmama Hərəkatı çərçivəsində səfərbər edilmişdi. Məhz bu çərçivədə hazırlanan məlumat bazası Ümumdünya Səhiyyə Təşkilatı üçün pandemiya ilə mübarizədə Qoşulmama Hərəkatına üzv dövlətlərin ehtiyaclarının müəyyən edilməsində əsas mənbə rolunu oynadı. Mühüm siyasi addımlardan biri kimi "peyvənd millətçiliyi"i qlobal müstəvidə müzakirəyə çıxarıldı.Bu gün isə institusionallaşmaya doğru addımlar atmaqla Hərəkat qarşısında ciddi hədəflər var. Prezident İlham Əliyev hesab edir ki, Təsisat Fransanın simasında bütövlükdə neokolonializmin tamamilə aradan qaldırılması istiqamətində səylərini birləşdirməlidir.
Beləliklə, təhlil edərkən aydın olur ki, Bakı Zirvəsi həqiqətən də dünya nizamının dəyişməsi, qlobal ədalətin təmin olunması üçün mühüm fürsət yaradıb. Cənab İlham Əliyevin 2 illik rəhbərliyi planetin ikinci böyük təsisatı olan Qoşulmama Hərəkatına şans və real imkanlar yaradıb ki, BMT-nin artıq öhdəsindən gələ bilmədiyi problemlərin həlli və buraxdığı nəhəng boşluqların doldurulması istiqamətində təşəbbüsləri ələ alsın".

Telegramda izləyin