Tanınmayan Dağlıq Qarabağ hakimiyyəti Azərbaycanının Bakı dəvətini rədd edib

Tanınmayan Dağlıq Qarabağ Respublikasının Xarici İşlər Nazirliyi martın 13-də Azərbaycanın Bakıda yeni görüşün keçirilməsi təklifinə cavab verib.

Sonxeber.az Armenpress-ə istinadən xəbər verir ki, tanınmayan Dağlıq Qarabağ Respublikası Azərbaycanın təklifini rədd edib.

Qondarma Dağlıq Qarabağ Xarici İşlər Nazirliyinin bəyanatında deyilir ki, Qarabağ və Azərbaycan nümayəndələri arasında belə görüşlər Rusiya sülhməramlılarının vasitəçiliyi martın 1-də görüşün keçirildiyi məkanda keçirilə bilər. Tanınmayan Dağlıq Qarabağ hakimiyyəti hesab edir ki, bu cür müzakirələr siyasi yox, humanitar, infrastruktur və texniki məsələlər ətrafında aparılmalıdır.

"Azərbaycan Prezidenti Administrasiyasının Azərbaycan və Artsax nümayəndələri arasında görüşün keçirilməsi ilə bağlı təklifinə cavab olaraq bildiririk ki, Artsax Respublikası bu cür görüşlərin Rusiya sülhməramlılarının vasitəçiliyi ilə keçirilə biləcəyi barədə əvvəllər bəyan etdiyi mövqeyinə sadiqdir. 1 mart iclasının keçirildiyi eyni məkanda, humanitar, infrastruktur və texniki məsələlər ətrafında, lazımsız siyasiləşdirmə aparılmadan görüş keçirilə bilər.
Eyni zamanda bildiririk ki, Laçın dəhlizinin bağlanması və humanitar böhranın davam etməsi qəbuledilməzdir və danışıqlar üçün əlverişli mühitin formalaşmasına heç bir töhfə vermir. Hesab edirik ki, Azərbaycan güc tətbiq etməklə hədələməkdən, birtərəfli, maksimalist yanaşmalardan çəkinməklə həm 9 noyabr 2020-ci il üçtərəfli bəyanatı əsasında üzərinə götürdüyü öhdəlikləri, həm də Beynəlxalq Ədalət Məhkəməsinin qərarının tələblərini layiqincə yerinə yetirməlidir. Yalnız bundan sonra gələcək müzakirələr üçün əlverişli şərait yaranacaq. Azərbaycan-Qarabağ münaqişəsinin nizamlanmasının siyasi məsələlərinə gəlincə, xatırladaq ki, Artsax münaqişənin beynəlxalq səviyyədə tanınmış və təsdiq edilmiş formatda, beynəlxalq təminatlar şəraitində baş tutmalı olan münaqişənin hərtərəfli həllinə yönəlmiş danışıqlara sadiqdir" ,- deyə bəyanatda bildirilir.

Qeyd edək ki, Azərbaycan tanınmayan Dağlıq Qarabağ Respublikasının nümayəndələrini Qarabağ ermənilərinin Azərbaycana inteqrasiya etməklə bağlı görüş üçün Bakıya dəvət edib.

Şəbnəm Lətifi

Telegramda izləyin