İsrail fələstinlilərin cümə namazından əvvəl Qüdsə daxil olmasını məhdudlaşdırır

İsrail qüvvələri işğal altındakı İordan çayının qərb sahilindən Qüdsə doğru Məscidül-Əqsada Ramazan ayının ikinci cümə namazını qılmaq istəyən çoxlu sayda fələstinlinin qarşısını alıb.
Sonxeber.az xəbər verir ki, İordan çayının qərb sahilindən Şərqi Qüdsə gedən keçidlərdəki keçid məntəqələrinə əlavə qüvvələr göndərən İsrail əsgərləri, şəxsiyyət yoxlaması etdikləri bəzi fələstinlilərin keçidinə icazə verməyib.

Şərqi Qüdsün cənubundakı "300" adlı keçid məntəqəsi ilə şimaldakı Qallendiya keçid məntəqəsindən keçmək istəyən fələstinlilər izdiham yaradıb.

AA müxbirinə danışan fələstinli Rana Davud İsrail qüvvələrinin təhlükəsizlik baxımından Qüdsə Qallendiya keçid məntəqəsindən keçməsinə icazə vermədiyini bildirib.

Davud Ramazan ayının əvvəlində qəbul etdiyi qərarda İsrailin bütün qadınların Qüdsə keçməsinə icazə verdiyinə, lakin meydanda böyük məhdudiyyətlər olduğuna diqqət çəkib.

Fələstinli ana Eman Hüseyn isə oğullarından birinin İsrail həbsxanasında saxlandığını və işğalçıların təhlükəsizlik bəhanəsi ilə Qüds şəhərinə girməsinə icazə vermədiyini bildirib.

İsrail qüvvələrinin qərarını qınayan Hüseyn, "Bir fələstinlinin Qüdsə girib Məscidül-Əqsada namaz qılmasına mane olmağa nə haqqı var?" deyib.

Ötən həftə İsrail qüvvələri işğal altındakı İordan çayının qərb sahilindən Qüdsə doğru Məscidül-Əqsada Ramazan ayının ilk cümə namazını qılmaq istəyən çoxlu sayda fələstinlinin qarşısını alıb.

İsrail martın 20-də aldığı qərarla fələstinlilərə Ramazan ayında Məscidül-Əqsada cümə namazına qatılmaq üçün yaş məhdudiyyəti qoyub.

Bu çərçivədə işğal altındakı İordan çayının qərb sahilində yaşayan 12-45 yaş arası fələstinli kişilərin Ramazan ayında cümə namazı üçün Əqsaya girişi qadağan edilib, 45-55 yaş arası kişilər üçün isə xüsusi icazə tələb edilib.

Telegramda izləyin