"Vergiləri hamının eyni qaydada ödəməməsi rəqabət mühiti üçün ciddi problem yaradır"- İqtisadçı-ekspert

İstiqamət: azad sahibkarlığın və liberal iqtisadiyyatın təşviqi
"Azərbaycanda biznesə başlamaq çox rahatdır, onlayn şəkildə 1-2 günə biznesə başlamaq olar, hətta fiziki sahibkar şəxs kimi sahibkarlıq fəaliyyəti ilə məşğul olmaq istəyirsinizsə, bu, bir neçə saata baş verə bilər. Amma vergi yükü az olsa da, vergiləri hamının eyni dərəcədə ödəməməsi rəqabət mühiti üçün ciddi problem yaradır".

Bu sözləri iqtisadçı-ekspert Xalid Kərimli Sonxeber.az-a bildirib.

O qeyd edib ki, hökumət ixracyönümlü sahibkarlığı formalaşdırmağa çalışsa da, bu çox çətindir. Dövlət məmurlarına məxsus şirkətlərin mövcudluğu həmin sahədə qeyri-dövlət məmurlarının biznesini yaratmasına imkan vermir.

"Azərbaycanda azad sahibkarlığın vəziyyətinə birmənalı qiymət vermək çətindir. Bir çox məsələlər var ki, hətta dünyanın ən yaxşı səviyyəsindəyik. Biznesə başlamaq çox rahatdır, onlayn şəkildə 1-2 günə biznesə başlamaq olar, hətta fiziki sahibkar şəxs kimi sahibkarlıq fəaliyyəti ilə məşğul olmaq istəyirsinizsə, bu, bir neçə saata baş verə bilər. Dünyanın çox nadir ölkələrində bu cür prosedurlar var. Vergi yükünə görə Azərbaycan Avropanın istənilən ölkəsindən yaxşı vəziyyətdədir. Hökumətin biznesə dəstəyi, kiçik və orta sahibkarlığa vergi güzəştləri də normal vəziyyətdədir. Amma narahatlıq edən məsələ rəqabət mühiti ilə əlaqədardır. Vergi yükü az olsa da, vergiləri hamının eyni qaydada ödəməməsi rəqabət mühiti üçün ciddi problem yaradır. Bəziləri vergidən yayınır. Hökumət çalışır ki, ixracyönümlü sahibkarlıq formalaşdırsın, amma çox çətindir. Bunun obyektiv səbəbləri var, həm də hökumətin tənzimləməli olduğu məsələr var. Bazar da kiçik olduğuna görə ucuz ticarət vasitəsi olan okean və dənizə çıxışımız olmadığına görə bir çox sahələrdə rəqabət qabiliyyətli ola bilmirik. Üstəlik neft və qazdan rahat gəlirin gəlməsi ölkənin ciddi, sərt islahatlara getməsinə imkan vermir. Bundan əlavə, dövlət sektorunun bir çox sahələrdə monopoliyasının olması özəl sektorun fəaliyyət dairəsini məhdudlaşdırır. Eyni zamanda dövlət məmurlarına məxsus şirkətlərin mövcudluğu həmin sahədə qeyri-dövlət məmurlarının biznesini yaratmasına imkan vermir. Bu tip rəqabət mühiti ilə əlaqədar məsələlər var ki, sahibkarlığın inkişafına mane olur" ,- deyə Xalid Kərimli vurğulayıb.

Material Azərbaycan Respublikasının

Şəbnəm Lətifi

Telegramda izləyin