Hesablama Palatası: İnflyasiya ilə mübarizədə əməkhaqqı artımları risk yaradır

İnflyasiya ilə mübarizə fonunda monetar siyasətin sərtləşdirilməsi bəzi təşkilatların iqtisadi artım proqnozlarında azalma ilə nəticələnmiş, inflyasiya proqnozları nisbətən azaldılsa da, yüksək olaraq qalmaqda davam edib.

Sonxeber.az xəbər verir ki, bu, Milli Məclisin İqtisadi siyasət, sənaye və sahibkarlıq və Əmək və sosial siyasət komitələrinin iclasında müzakirəyə çıxarılan "Azərbaycan Respublikasının 2023-cü il dövlət büdcəsi haqqında" Azərbaycan Respublikasının Qanununda dəyişiklik edilməsi barədə" qanun layihəsinə Hesablama Palatasının Rəyi"ndə əksini tapıb.

Qeyd edilib ki, 2023-cü ildə beynəlxalq təşkilatlar tərəfindən yenilənmiş proqnozlara əsasən, əvvəlki ilə nisbətən iqtisadi artımın zəifləyəcəyi gözlənilir. Belə ki, ilkin proqnozlarda qlobal iqtisadi artımın təxminən 2,5%-3,0% ətrafında olacağı gözlənilsə də, 2023-cü ildə dərc edilmiş hesabatlara əsasən, bu göstəricinin təxminən 2,0-2,5% ətrafında olacağı nəzərdə tutulur. İqtisadi artım tempində azalma əsasən antiinfyasiya tədbirləri fonunda siyasətin sərtləşdirilməsi, maliyyə şərtlərinin pisləşməsi və mövcud müharibənin təsirlərinin davam etməsi ilə izah olunur. Dünya Bankının təhlillərinə əsasən, bu tendensiyanın davam etməsi növbəti qlobal böhran ilə nəticələnə bilər ki, bu da kiçik ölkələr, xüsusilə də iqtisadiyyatı xarici borcdan, kənar maliyyələşmədən asılı olan və məhdud diversifikasiyalı ölkələr üçün daha təhlükəli hesab edilir. 2022-ci ildə ikirəqəmli templə artan ərzaq qiymətləri 2023-cü ilin fevral ayından etibarən ucuzlaşmağa başlayıb. 2023-cü ildə sərt monetar siyasət və zəifləyən məcmu tələb şəraitində qiymət artımının nisbətən zəif olacağının proqnozlaşdırılmasına baxmayaraq, beynəlxalq təşkilatlar tərəfindən bu göstəricinin hələ də yüksək olduğu vurğulanır. Belə ki, 2022-ci ildə 8,7% qeydə alınmış inflyasiyanın BVF-in proqnozlarına əsasən, cari ilin sonunda 7,0%-ə enəcəyi gözlənilir. Cari ilin baxılan dövründə qlobal inflyasiya bir qədər zəifləsə də, enerji və ərzaq qiymətləri hələ də yüksək olaraq qalmaqda davam edir. Yüksək inflyasiya ilə mübarizə şəraitində isə əməkhaqqı artımlarının əməkhaqqı-inflyasiya spiralına çevrilə biləcəyi sual altında olmaqla, risk yaradan məqamlardan hesab edilir.

Telegramda izləyin