"Azərbaycan və Ermənistan xarici işlər nazirlərinin nəxirə salınmış görüşü tezliklə baş tutacaq" - Ermənistan Baş nazirin müavini

Ermənistan Baş nazirin müavini Tiqran Xaçatryan Vaşinqtonda keçiriləcək Azərbaycanla xarici işlər nazirlərinin təxirə salınmış danışıqlarının tezliklə keçiriləcəyinə inandığını bildirib.

Sonxeber.az xəbər verir ki, bu barədə erməni mətbuatı məlumat yayıb.

"Hesab edirəm ki, təxirə salınmış danışıqlar qısa müddət ərzində baş tutacaq", - deyə Xaçatryan bildirib.

Xaçatryan deyib ki, daim fikir mübadiləsi aparılır.

"Əgər hansısa mərhələdə biz təklif vermişiksə və hələ də bununla bağlı Azərbaycanın mövqeyi yoxdursa və ya əksinə, bu, adi prosesdir. Burada xüsusi olaraq nəyisə müşahidə etməyə ehtiyac yoxdur. Əsas odur ki, tərəflər qeyd edirlər ki, son müzakirələr və danışıqlar fikirləri daha da yaxınlaşdırır", - deyə o əlavə edib.

Qeyd edək ki, Azərbaycan və Ermənistan arasında iyunun 12-də Vaşinqtonda keçirilməsi planlaşdırılan xarici işlər nazirləri danışıqları Azərbaycan tərəfindən təxirə salınıb.

Şəbnəm Lətifi

Telegramda izləyin