"Ermənistan tikintiyə başlamamışdan əvvəl Azərbaycanla müzakirələr aparmalı idi" - Nəsib Məhəməliyev

Ermənistan Azərbaycanla sərhədinin 500-600 metr yaxınlığında iri metallurgiya kombinatının inşasına başlayıb.

Mövzu ilə bağlı Sonxeber.az-a danışan Milli Məclisin deputatı Nəsib Məhəməliyev bildirib ki Ermənistan tikintiyə başlamamışdan əvvəl həmsərhəd dövlət olan Azərbaycanla müzakirələr aparmalı, razılaşdırmalı idi.

Deputat qeyd edib ki, bu, onsuz da gərgin olan münasibətlərin daha da mürəkkəbləşdirilməsinə xidmət edir:

"Ermənistanın Azərbaycanla sərhədinin cəmi 500-600 metr yaxınlığında iri metallurgiya kombinatının inşasına başlaması onsuz da gərgin olan münasibətlərin daha da mürəkkəbləşdirilməsinə xidmət edir. Beynəlxalq ekoloji normalara görə, Ermənistan tikintiyə başlamamışdan əvvəl həmsərhəd dövlət olan Azərbaycanla müzakirələr aparmalı, razılaşdırmalı idi. Əfsuslar olsun ki, Ermənistan hər zaman olduğu kimi məsələnin sivil yolla həllinə yox, konfrantasiya yoluna üstünlük verdi. Bu da təbii olaraq aparılan sülh danışıqlarına zərbə vurmaqdır".

Deputat ABŞ-nin bayrağının zavoddan asılmasına da münasibət bildirib. O qeyd edib ki, ermənilər zavodun Amerika şirkətinin investisiyası hesabına tikildiyini göstərməyə çalışırlar:
"ABŞ bayrağının asılması məsələsinə gəldikdə isə, ermənilər göstərmək istəyirlər ki, zavod Amerika şirkətinin investisiyası hesabına tikilir və təhlükəsizlik baxımından çəkindirici amil ola bilər. Yaxşı olardı ki, hər zaman, ATƏT-in Minsk qrupu həmsədrliyində Azərbaycanın haqlı mövqeyini dəstəkləmiş Birləşmiş Ştatlar belə bir həssas dönəmdə dövlət bayrağının qaranlıq məqsədlər üçün istufadəsinə icazə verməsin. Belə cılız təxribatlar, sülhə yönəlik atılmış addımların səmərəliliyini azaldır, münasibətlərin gərginləşməsinə səbəb olur".

Telegramda izləyin