"Növbəti "Qisas" əməliyyatı bir daha Ermənistana Azərbaycan ordusunun nəyə qadir olduğunu göstərdi" - DEPUTAT

Xəbər verdiyimiz kimi iyunun 27-si saat 20:05-də Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri tərəfindən Ordumuzun Ağdam rayonunun Qalayçılar kəndi istiqamətində yerləşən mövqeləri atıcı silahlardan atəşə tutulub. Qanunsuz erməni silahlı birləşmələr təxribatı nəticəsində Azərbaycan Ordusunun hərbi qulluqçusu Bəkirov Əli Şükür oğlu yaralanıb. Azərbaycan Silahlı Qüvvələrinin cavab tədbirləri nəticəsində - "Qisas" əməliyyatı ilə qanunsuz silahlı birləşmənin istehkamı və 5 üzvü məhv edilib.

Bununla bağlı Sonxeber.az-a danışan deputat bildirib ki, növbəti "Qisas" əməliyyatı ilə ordumuzun gücünü və nəyə qadir olduğunu bütün dünyaya göstərdi:

"Hər zaman olduğu kimi Ermənistan verdiyi sözə əməl etmir və təxribatlarını davam etdirir. 2020-ci il 10 noyabr tarixində imzalanmış üçtərəfli bəyanata görə qısa müddət ərzində qanunsuz erməni silahlı birləşmələri Azərbaycan ərazilərini tərk etməli idi. Üçtərəfli bəyanatın imzalanmasından 3 il keçməsinə baxmayaraq Ermənistan üzərinə götürdüyü öhdəliyi icra etmir. Əksinə regionda vəziyyəti gərginləşdirmək üçün təxribatlarını davam etdirməkdədir. Bu təxribatların Rusiya sülhməramlılarının müvəqqəti yerləşdiyi Azərbaycan ərazisində baş verməsi bizdə müəyyən suallar yaradır. İyunun 27-də törədilən təxribatlar bir daha onu göstərdi ki, Rusiya sülhməramlıları Qarabağda terrorçulara dəstək verir, onları himayə edir".

Deputat vurğulayıb ki, 44 günlük Vətən müharibəsində məğlub olaraq kapitulyasiya aktına qol çəkmiş Ermənistan təxribatlarını davam etdirir:

"44 günlük Vətən müharibəsinin bitməsindən 3 il keçsə də Ermənistan dövlətinin qanunsuz silahlı birləşmələri Azərbaycan torpaqlarında qalmaqdadır. Ermənistan təəssüf ki, bu gün də Azərbaycan dövlətinin gücünü və qüdrətini qiymətləndirə bilmir. Yaxşı olar ki, Ermənistan 44 günlük Vətən müharibəsindəki biabırçı məğlubiyyətini unutmasın. Düşünürəm ki, növbəti "Qisas" əməliyyatı bir daha Ermənistana Azərbaycan ordusunun nəyə qadir olduğunu göstərdi. İgid oğullarımız yenə də erməniləri hərb meydanında diz çökdürərək silahlı birləşmənin istehkamını və 5 üzvünü məhv elədi. Ümid edirəm ki, Ermənistan növbəti məğlubiyyətindən dərs çıxaracaq və tezliklə sülh müqaviləsini imzalayacaq".

Telegramda izləyin