Vətəndaş Kapital bankdan kredit götürmək istəyəndə əlil olduğunu öyrənib

Zərdab rayon sakini Xəqani Abdullayevin əlilliyi 2021-ci ildə ləğv olunsa da, Kapital bank ona əlil olduğunu əsas gətirərək kredit verməyib.

Bu barədə Xəqani Abdullayev Sonxeber.az-a bildirib.

O qeyd edib ki, Birinci Qarabağ müharibəsi veteranıdır. 2011-ci ildə isə avtomobil qəzası nəticəsində əlil olub. Lakin 2021-ci ildə onun əlilliyi ləğv edilib və aldığı 130 manat müavinət dayandırılıb.

Xəqani banka kredit üçün müraciət edəndə bildirilib ki, o, rəsmi olaraq hələ də əlil sayılır və işə yararsız olduğu üçün kredit götürə bilməz. Xəqani Abdullayev hazırda Zərdab rayon Suvarma Sistemləri İdarəsində işləyir.

Məsələ ilə bağlı Əmək və Əhalinin Sosial Müdafiəsi nəzdində Dövlət Tibbi-Sosial Ekspertiza və Reabilitasiya Agentliyi ilə əlaqə saxladıq.

Dövlət Tibbi-Sosial Ekspertiza və Reabilitasiya Agentliyinin İctimaiyyətlə əlaqələr şöbəsinin müdiri Tural Qurbanov bildirib ki, Xəqani Abdullayevin əlilliyinin ləğv olunması ilə bağlı elektron sistemdə məlumat var.

"Vətəndaşın əlilliyinin ləğv olunması ilə bağlı elektron sistemdə məlumat var və biz hazırda o məlumatı görürük. Problem bizim qurumda deyil. O, müraciət etdiyi banka bir daha müraciət etməlidir" ,- deyə Tural Qurbanov bildirib.

Şəbnəm Lətifi

Telegramda izləyin