"Tarix "no war"çıları özünün zibilliyinə atacaq"

"İstənilən cəmiyyətin içərisində milli maraqlara zidd mövqe tutan, xaricdən maliyyələşən bir və ya bir neçə qrup olur. Çox təəssüf ki, Azərbaycanda da bu qruplar mövcuddur. Onlardan biri də "no war"çılar adlanan şəxslərdir. Onlar işğal dövründə Ermənistanın mənafeyini açıq və gizli şəkildə müdafiə edirdilər".

Bu fikirləri Oxu.Az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə deyib.

O qeyd edib ki, "no war"çılar xaricdə iştirak etdikləri tədbirlərdə heç bir zaman Ermənistanın işğalçı siyasətini üzə çıxarmaq, əsl niyyətini ortaya qoymaq istəmirdilər:

"44 günlük müharibə dövründə həmin merkantil qruplar susdular. Xaricdə toplaşmış bir qrup azərbaycanlı mühacirlər isə Azərbaycan ordusunun qələbəsinə kölgə salmağa çalışdılar. İndi isə "no war"çılar deyilən bir qrup meydana gəlib və bunların bəyanatlarının Azərbaycanda, Bakıda deyil, xaricdə hazırlandığına hər hansı bir şübhə yoxdur. Onlar 5-10 manat çirkli pulun əvəzində özlərini milli maraqlara, Azərbaycan əsgərinə, şəhid ailələrinə qarşı qoyurlar. Onların Azərbaycan xalqı ilə hər hansı bir bağlılığı yoxdur. Onlar əzəldən xarici maliyyə vəsaiti ilə xarici dairələrin Azərbaycandakı maraqlarının "oyunçusuna" çevriliblər".

Deputat vurğulayıb ki, "no war"çılar Ermənistanın işğalçılıq siyasətini gündən-günə daha açıq şəkildə müdafiə etməyə başlayırlar:
"Onlar Azərbaycanda olan demokratik ab-havadan bilirlər ki, söz azadlığına görə onlara heç nə olmayacaq. Əmindirlər ki, açıq şəkildə fərqli mövqe nümayiş etdirə bilərlər və s. "No war"çılara layiq olduğu ən sərt cavab verilməlidir. Onların sayı çox azdır. Bir qrupdan, bir dərnəkdən başqa heç kim deyillər. Bu şəxsləri gənclər, ziyalılar, qadınlar, müharibə iştirakçıları, şəhid ailələri dəstəkləmirlər. Qeyd etdiyim kəsim Prezidentin, dövlətin, dövlətçiliyin yanındadırlar. Təəssüf ki, bu gün Ermənistan maraqlarını açıq şəkildə müdafiə edən bəzi şəxslər onlara həyat, inkişaf, çörək verən Vətənə qarşı iftiralar yazmağı özlərinə şərəf bilirlər. Tarix belələrini onsuz da özünün zibilliyinə atacaq.

"No war"çılar gec-tez öz mənəvi cinayətlərini dərk edəcəklər. Elələrini azərbaycanlı adlandırmaq düzgün olmaz. Torpaqların işğalı tarixini yaşamış, ailələrində, qonşularında, yaxınlarında şəhid yası görmüş insan heç bir zaman Azərbaycana qarşı belə çirkin mövqe tuta bilməz".

Qeyd edək ki, avqustun 15-də özünü "no war"çılar adlandıran bir qrup gənc tədbir keçirib. Onlar Azərbaycanı "işğalçı dövlət", "aqrerssor", Azərbaycan xalqını isə "işğalçı rejimi dəstəkləyən kütlə" adlandırıb, şəhid və qazi ailələrini təhqir ediblər. Xaricdən maliyyələşən bu insanlar cəmiyyətimizin ayrı-ayrı üzvləri tərəfindən sərt tənqid olunublar.

Telegramda izləyin