Lokal antiterror əməliyyatı Azərbaycanın və İlham Əliyevin qüdrətini bütün dünyaya göstərdi - ŞƏRH

"2023-cü il sentyabrın 19-20-də bir sutkadan da az davam edən lokal antiterror əməliyyatı nəticəsində Qarabağdakı bölücülüyə və Ermənistanın təcavüzünə birdəfəlik son qoyuldu. Eyni zamanda, Ermənistanın arxasındakı qüvvələrə açıq mesaj verildi ki, Azərbaycanla bu oyunlar dayandırılmalıdır və birdəfəlik bitirilməlidir".

Bunu Sonxeber.az-a açıqlamasında siyasi şərhçi Azər Həsrət deyib.

Ekspert bildirib ki, nəticə etibarilə, oradakı qondarma qurum özünü buraxmalı oldu:

"Azərbaycanın çağırışlarına baxmayaraq, erməni əhali Azərbaycan torpaqlarını tərk etmək qərarı verdi və sakit şəkildə bölgədən getdi. Bundan başqa, Rusiyanın sülhməramlı adı altında bölgəyə yerləşdirdiyi qüvvələr də burada görəcəkləri bir işin qalmadığını anlayaraq Azərbaycandan çıxmalı oldular. Azərbaycan onları beş il müddətinə öz ərazisinə buraxmışdı, lakin beş il tamam olmadan Rusiya sülhməramlıları Azərbaycandan çəkilib getdilər. Bu, Azərbaycan dövlətinin və təbii ki, onun rəhbəri, Müzəffər Ali Baş Komandan İlham Əliyevin qüdrətini bütün dünyaya göstərdi. Bundan sonrakı mərhələdə Azərbaycanın həm 2020-ci ilin 44 günlük müharibəsindəki, həm də bir sutkadan az davam edən antiterror əməliyyatındakı bacarıqları dünyada diqqətlə izlənilməyə və öyrənilməyə başladı. Hətta Azərbaycanın bu uğurları artıq hərbi məktəblərdə ayrıca öyrənilir və tədris edilir".

Onun sözlərinə görə, Azərbaycan dövləti kiçik dövlət olmasına baxmayaraq, öz qüdrətini göstərdi və bununla da bölgəmizdə bölücülüyə və terrorçuluğa son qoyuldu:

"Bundan sonrakı mərhələdə artıq Ermənistanla sülh müqaviləsi paraflanıb və onun imzalanması üçün Ermənistanın atacağı bəzi addımların tamamlanmasını gözləyirik. Faktiki olaraq, Azərbaycanla Ermənistan artıq dinc yanaşı yaşamağa başlayıblar. Ermənistan təcavüzkarlıqdan, terrorçuluqdan və bölücülükdən imtina edib. Azərbaycan da həmişə bəyan etdiyi prinsiplərə sadiq qalaraq belə bir şəraitdə Ermənistanla birlikdə dinc yanaşı yaşamağı bacara biləcəyini əməldə də göstərir".

Röyalə Xəyal

Telegramda izləyin