Xankəndini tərk edən ermənilərin boş qalan evlərinin taleyi necə olacaq? -AÇIQLAMA

Azərbaycanın vətəndaşlığını qəbul etməkdən imtina edərək Qarabağı tərk edən ermənilərin sayı 80 mini ötüb. Onlar özləri könüllü olaraq həm avtobuslarla, həm də şəxsi avtomobilləri ilə Qarabağı tərk edib Ermənistana gedirlər. Erməni əsilli şəxslərin Ermənistana sərbəst keçidi üçün şərait yaradılır. Bəs Xankəndini tərk edən ermənilərin boş qalan evlərinin taleyi necə olacaq?

Bununla bağlı Sonxeber.az-a açıqlama verən əmlak məsələləri üzrə ekspert Elnur Fərzəliyev bildirib ki,1990-cı illərin əvvəllərində Birinci Qarabağ müharibəsi başlandı və 10 minlərlə azərbaycanlı öz yurd yuvalarından məcburi köçkün düşdülər:

"Onların bir qismi Bakı, Sumqayıt və Azərbaycanın müxtəlif bölgələrində salınan yataqxanalarda, çadırlarda və vaqonlarda qaldılar. Bir hissəsi isə şəhərdə boş qalmış evlərdə yaşamağa başladılar. Vətəndaşlarımız hansı evlər boş idisə məcburən orada sığındılar. Həmin dövrdə bir qanun layihəsi hazırlandı.Hazırlanan qanun layihəsinə görə məcburi köçkünlər hansı evdə sığınmışdısa torpaqlar alınana qədər orada yaşamalıdırlar. Yəni torpaqları işğal olunan sodaşlarımıza sığındıqları evdə yaşama hüququ verildi. Amma o əmlakların məcburi köçkünlərin adına rəsmiləşdirilməsinə icazə verilmədi. Bununla belə dövlətimiz məcburi köçkünlərin yaşaması üçün böyük şəhərciklər tikdi. Məcburi köçkünlərimiz yenitikili binalar, təmirli evlərlə təmin edildi. Lakin o evlərə belə mülkiyyət hüququ verilməyib. Yalnız yaşama hüququ ilə bağlı müqavilə bağlanılıb. Çıxarış verilməyib. Dövlətimiz vətəndaşlarımıza belə özgənin evini özəlləşdirməyə icazə verməyib".

Ekspert bildirib ki, Qarabağda yaşayan ermənilərə biz baxsaq 44 günlük Vətən müharibəsindən sonra regionda yasayan ermənilərin əksəriyyəti oradan gedib:

"Söhbət burada yerli, yəni orada yaşayan ermənidən gedir. Qarabağı tərk edən ermənilərə nəzər yetirsək görərik ki, böyük əksəriyyəti Rusiya və İrəvandan vətəndaşıdır. Yəni Qarabağda sonradan yaşayanlardır. Onlar sonradan gəlmə olduqları üçün də yaşadıqları evlərin əksəriyyəti Qarabağda yaşayan azərbaycanlılara aiddir. Qarabağda ev tiksələr belə torpaq onların deyil. Həmin torpaqlar Azərbaycanın torpağıdır. Yalnız 90-cı ildən əvvəldən orada yaşayan ermənilərə mülkiyyət hüququ verilə bilər. Yəni yerli və yaşadığı evin sahibi olan ermənilərə. Qarabağda yaşayan ermənilər azərbaycanlıların evlərinə məcburən giriblər".

Ekspert qeyd edib ki, ermənilər Azərbaycanın boş torpaq sahələrinə əmlaklar tikiblər:

"Xüsusilə, Xankəndi ərazisində bu hallar mövcuddur. Təbii ki 2020-ci ildən bu günə qədər ermənilər kütləvi halda, 3 dəfə öz əmlaklarını satışa çıxardılar. Söhbət Xankəndidəki evlərdən gedir. Ermənilər evləri fantastik qiymətə satışa çıxarıblar. Ermənilər yaxşı bilirlər ki, bu evləri heç kim ala bilməz. Çünki artıq Azərbaycan öz ərazi bütövlüyünü bərpa edib. Ərazi Azərbaycanın olduğu üçün satışda qanunvericiliyə uyğun aparılmalıdır. 2020-ci ildən sonra ermənilərə verilmiş bütün sənədlər artıq öz hüququ əsasını itirib. İstər çıxarış, istər tələblər olsun. Çünki dəfələrlə onlara müraciət olunub ki, siz bu Azərbaycan vətəndaşlığını alın və yaşayın. Bu nə deməkdir? Bu o deməkdir ki, tək onların yaşamaq hüququ əldə etməsi demək deyil. Həmdə onların əmlaklarının Azərbaycan qanunvericiliyinə uyğun olaraq adlarının rəsmiləşdirilməsi idi".

Elnur Fərzəliyev sözlərinə görə, ermənilər təkliflərimiz ilə razılaşmayıblar və evləri satışa çıxarıblar:

"Bir halda ki, sənin heç bir yerə çıxışın yoxdu. Sən Azərbaycan ərazisindəsən və başında Rusiya sülhməramlısı var. Bundan əlavə sən Azərbaycan ərazisindəsən və hansı rəsmi sənədlə, pulla alqı-satqı edirsən. Onlar bilirlər ki, bu əmlakların satışı mümkün deyil. Ermənilərin aşadıqlar evlər üzərində heç bir mülkiyyət hüququ yoxdur. Çıxıb gedən ermənilərin evləri birbaşa Azərbaycan əmlakıdır. Ən qısa müddətdə həmin evlərə vətəndaşlarımızı köçürməliyik. Bütün arxiv araşdırılır, çıxarılır. Bu gün ermənilərə o evlər verilə bilməz".

Aysel Yusifqızı

Telegramda izləyin